म्याग्दी । पछिल्लो मनसुनजन्य विपद्का कारण बाढीपहिरोले अवरुद्ध बनेको कालीगण्डकी कोरिडोरअन्तर्गत बेनी–जोमसोम–कोरला सडकको अधिकांश क्षेत्रमा प्रारम्भिक मर्मत सम्पन्न भएको छ।
असोज ८ देखि ११ गतेसम्म परेको भारी वर्षापछि कालीगण्डकी नदीमा आएको बाढी र पहिरोका कारण सडकखण्डका ५५ स्थानमा अवरोध सिर्जना भएको थियो। बाढीले १० स्थानमा सडक कटान गर्नुका साथै कतिपय ठाउँमा सडक नै बगाएको थियो।
बेनी–जोमसोम–कोरला सडक योजनाका प्रमुख तेजस्वी शर्माका अनुसार म्याग्दीको अन्नपूर्ण गाउँपालिका–६ पोखरेबगरमा कालीगण्डकीले बगाएको सडक पुलको पहुँचमार्ग र रघुगङ्गा गाउँपालिका–२ कुनौटाबाहेक अन्य स्थानमा मंगलबारसम्म प्रारम्भिक मर्मत सकिएको छ।
उनका अनुसार मालढुङ्गादेखि कुनौटासम्म तथा कोरलादेखि पोखरेबगरस्थित सडक पुलसम्म ठूला सवारीसाधन सञ्चालन गर्न मिल्ने गरी सडक मर्मत गरिएको छ। पोखरेबगर–कुनौटा खण्डअन्तर्गत रातोपानी, धिरच्याङ, भिरकाटे, महभिर, तिप्ल्याङ र बेगखोलामा पहिरो पन्छाएर नयाँ मार्ग निर्माण गर्ने कामसमेत पूरा भएको छ।
बाढीले कुनौटामा करिब २५० मिटर सडक पैदलयात्रासमेत गर्न नमिल्ने गरी बगाएको थियो। त्यस्तै, पोखरेबगरको पुलको पहुँचमार्गमा पनि क्षति पुगेको थियो। कुनौटामा चारवटा एक्साभेटर र टिप्पर परिचालन गरी माटो भर्ने काम भइरहेको छ भने पोखरेबगरमा मजदुर तथा उपकरण परिचालन गरी ग्यावियन पर्खाल निर्माण भइरहेको छ।
कुनौटामा आगामी सोमबारसम्म सवारीसाधन सञ्चालन गर्ने लक्ष्यसहित उपकरण र जनशक्ति परिचालन गरिएको योजना प्रमुख शर्माले बताए।
रघुगङ्गा गाउँपालिका–३ तिल्केनीचौरस्थित राहुघाट जलविद्युत् आयोजनाको विद्युत्गृह परिसरमा बाढीले सडक कटान गरेपछि वैकल्पिक मार्ग निर्माण गर्न सुरुमा इन्धन अभाव भएको थियो। अहिले नेपाली सेना, स्वयंसेवक तथा ड्रोनको सहयोगमा ढुवानी र सापटीमार्फत इन्धन व्यवस्थापन भएपछि काममा सहजता आएको आयोजनाले जनाएको छ। विद्युत्गृह अगाडिको सडक मार्ग खुलाउने कामसमेत सम्पन्न भएको छ।
सडक विभाग र निर्माण व्यवसायीका १५ एक्साभेटर, १२ टिप्पर र १५ लोडरसहितको जनशक्ति परिचालन गरी सडक मर्मत तथा पुनर्निर्माणको कामलाई तीव्रता दिइएको संघीय सडक सुपरीवेक्षण आयोजना पोखराका प्रमुख नरेन्द्र सुवेदीले बताए।
“सडक विभाग र निर्माण कम्पनीले अवरुद्ध सडक खुलाउन सबै स्थानमा समानान्तर रूपमा काम गरिरहेका छन्,” उनले भने।
यसपटकको विपद्बाट बेनी–जोमसोम–कोरला सडकमा ठूलो क्षति पुगेको छ। सडक पुनर्निर्माणका लागि करिब तीन अर्ब रुपैयाँ लाग्ने प्रारम्भिक अनुमान सडक विभागले गरेको छ।
रसुवा र तातोपानी नाका बन्द रहेकाले चीनसँगको व्यापारका लागि कोरला नाका महत्वपूर्ण बनेको छ। कोरला नाका जोड्ने सडकलाई शीघ्र सञ्चालनमा ल्याउन सरकारले उच्च प्राथमिकताका साथ काम गरिरहेको म्याग्दीका प्रमुख जिल्ला अधिकारी गणेश गैरेले बताए।
मुस्ताङको स्याउ बजार पठाउने समय सुरु भइसकेको छ भने दसैँ–तिहारका लागि भेडाच्याङ्ग्रा बजार झार्ने समय पनि नजिकिँदैछ। पर्यटकीय याम सुरु भएसँगै बेनी–जोमसोम सडक छिटो सञ्चालनमा ल्याउनुपर्ने दबाब बढेको छ।
