काठमाडौं । नेपाली कांग्रेसको १५औँ महाधिवेशन असोज १८ गतेदेखि काठमाडौंमा सुरु हुने भएको छ । प्राकृतिक प्रकोपका कारण असोज १६ गतेका लागि निर्धारित उद्घाटन कार्यक्रम दुई दिन पछि सारिएको हो ।
महाधिवेशनको प्राविधिक तथा व्यवस्थापकीय तयारी अन्तिम चरणमा पुगेको पार्टीका प्रवक्ता एवं १५औँ महाधिवेशन सूचना, सञ्चार तथा प्रविधि समितिका संयोजक देवराज चालिसेले बताए । उनका अनुसार महाधिवेशनका लागि १५ वटा समिति गठन गरी तयारी अघि बढाइएको छ ।
उद्घाटन स्थल खुलामञ्चमा मञ्च निर्माण तीव्र पारिएको छ भने बन्द सत्रका लागि विभिन्न हलको तयारी भइरहेको छ । कार्यक्रमस्थलमै मिडिया सेन्टर र प्राथमिक स्वास्थ्य उपचार केन्द्र स्थापना गरिने कांग्रेसले जनाएको छ ।
महाधिवेशनमा देशभरबाट ७ हजार ७ सयभन्दा बढी प्रतिनिधि सहभागी हुने केन्द्रीय निर्वाचन समितिले जनाएको छ । उनीहरूले असोज १८ गते उद्घाटन, १९ र २० गते बन्द सत्र तथा २१ र २२ गते निर्वाचन प्रक्रियामा भाग लिनेछन् । निर्वाचनको विस्तृत कार्यक्रम निर्वाचन समितिले तयार गरिरहेको छ ।
महाधिवेशन प्रतिनिधिका लागि एयरपोर्ट, गौशाला, सुन्धारा, ठमेल, लाजिम्पाट, कलंकी र नयाँ बसपार्क क्षेत्रमा आवासको व्यवस्था गरिएको छ । आवास तथा कार्यक्रमस्थलसम्मको आवतजावत खर्च भने सहभागी स्वयंले बेहोर्ने व्यवस्था गरिएको कांग्रेसले जनाएको छ । बिहान, दिउँसो र साँझको भोजनको व्यवस्था भृकुटीमण्डपमा गरिएको छ ।
यसपटक प्राकृतिक विपद्को अवस्थालाई ध्यानमा राख्दै महाधिवेशनमा प्रचारप्रसारमा तामझाम नगर्ने निर्णय गरिएको चालिसेले बताए । कार्यक्रमस्थलमा मूल गेटबाहेक अन्य प्रचार सामग्री नराखिने र काठमाडौं उपत्यकालगायत प्रमुख सहरका करिब १०० डिजिटल बोर्डमार्फत सूचना तथा सन्देश प्रवाह गरिने उनले बताए । निर्वाचनमा उम्मेदवार बन्नेहरूलाई पनि डिजिटल माध्यमबाट मात्र प्रचार गर्न कांग्रेसले आग्रह गरेको छ ।
उद्घाटन सत्रमा विभिन्न राजनीतिक दलका प्रमुख तथा प्रतिनिधिलाई आमन्त्रण गरिएको छ । कांग्रेसका अनुसार राष्ट्रिय स्वतन्त्र पार्टीका सभापति रवि लामिछाने, नेकपा एमालेका अध्यक्ष केपी शर्मा ओली, नेपाली कम्युनिष्ट पार्टीका अध्यक्ष पुष्पकमल दाहाल ‘प्रचण्ड’, राष्ट्रिय प्रजातन्त्र पार्टीका अध्यक्ष राजेन्द्र लिङ्देन, जनता समाजवादी पार्टीका अध्यक्ष उपेन्द्र यादव र जनमत पार्टीका अध्यक्ष चन्द्रकान्त राउतलगायतको सहभागिता निश्चित भएको छ ।
अन्तर्राष्ट्रिय अतिथिका रूपमा सोसलिस्ट इन्टरनेसनलकी कार्यकारी संयोजक चन्ताल काम्बिवा नेपाल आइसकेकी छन् । अन्य अन्तर्राष्ट्रिय अतिथिको सहभागिता पनि सुनिश्चित हुने क्रम जारी रहेको कांग्रेसले जनाएको छ ।
महाधिवेशनसम्बन्धी सूचना अद्यावधिक गर्न अब दैनिक पत्रकार सम्मेलन गरिने चालिसेले बताए । उनका अनुसार भोलिदेखि कार्यक्रमस्थलमै रहेको मिडिया सेन्टरबाट पत्रकार सम्मेलन हुनेछ ।
