काठमाडौं । नेपाली कांग्रेसका पूर्वसभापति शेरबहादुर देउवा पक्षले पार्टीको १५औँ महाधिवेशनअन्तर्गत आजदेखि वडा अधिवेशन सुरु गर्दैछ। संस्थापन पक्षले असोज १८ गतेदेखि महाधिवेशन प्रक्रिया अघि बढाउने तयारी गरिरहेका बेला देउवा पक्षले समानान्तर रूपमा आफ्नो अधिवेशन प्रक्रिया अघि बढाएको हो।
देउवा पक्षले आगामी मङ्सिर २१ देखि २३ गतेसम्म १५औँ महाधिवेशन गर्ने कार्यतालिका तय गरेको छ। सोही कार्यतालिकाअनुसार असोज २० गते पालिका अधिवेशन, असोज २३ गते प्रदेशसभा निर्वाचन क्षेत्रीय अधिवेशन र मङ्सिर ४ गते प्रदेश अधिवेशन गर्ने कार्यक्रम सार्वजनिक गरिएको छ। उक्त कार्यतालिका निर्वाचन आयोगलाई समेत बुझाइसकिएको छ।
देउवा पक्षका नेता किरणराज पौडेलका अनुसार ७७ वटै जिल्लामा केन्द्रीय निर्वाचन समितिका तर्फबाट निर्वाचन अधिकृत खटाइएको छ। यस्तै, ५६ जिल्लामा निर्वाचन संयोजकसमेत परिचालन गरिएको उनले जानकारी दिए।
कांग्रेसको आधिकारिकतासम्बन्धी विवाद सर्वोच्च अदालतमा विचाराधीन रहेकाले तत्काल महाधिवेशन गर्न नहुने अडान देउवा पक्षले राख्दै आएको थियो। तर, संस्थापन पक्षले असोज ३ गतेदेखि नै महाधिवेशन प्रक्रिया अघि बढाएपछि देउवा पक्षले पनि छुट्टै कार्यतालिका सार्वजनिक गर्दै समानान्तर रूपमा अधिवेशन तयारी थालेको हो।
देउवा पक्षले १४औँ महाधिवेशनबाट निर्वाचित कार्यसमितिलाई नै पार्टीको आधिकारिक कार्यसमिति भएको दाबी गर्दै आएको छ। यही आधारमा उसले संस्थापन पक्षले अघि बढाएको महाधिवेशन प्रक्रियामा सहभागी नहुने र आफ्नै कार्यतालिकाअनुसार अधिवेशन अघि बढाउने निर्णय गरेको हो।
