बागलुङ– असोज ९ देखि ११ गतेसम्म परेको अविरल वर्षापछि आएको बाढीपहिरोका कारण बागलुङका निसीखोला र तमानखोला गाउँपालिका बढी प्रभावित भएका छन् । जिल्ला प्रशासन कार्यालयका अनुसार बाढीपहिरोमा परी जिल्लाभर ६१ घरगोठ बगेका छन् भने ५१ घरमा आंशिक क्षति पुगेको छ ।
बाढीपहिरोका कारण हालसम्म १२ जनाको मृत्यु भएको छ भने एक महिला अझै बेपत्ता छन् । बाढीले गलकोट नगरपालिका–९ को वडा कार्यालयसमेत बगाएको छ । यस्तै तीनवटा झोलुङ्गे पुल बगेका छन् भने दुईवटा प्रहरी कार्यालयमा आंशिक क्षति पुगेको छ ।
प्रमुख जिल्ला अधिकारी कृष्णप्रसाद आचार्यका अनुसार विपद्का कारण दुई जलविद्युत् आयोजनामा आंशिक क्षति पुगेको छ । एक विद्यालय, एक रिसोर्ट र एक कृषि फार्ममा पनि क्षति भएको छ । बाढीपहिरोमा २५६ पशुचौपाया प्रभावित भएका छन् भने २१५ कुखुरा मरेका छन् ।
निसीखोला गाउँपालिका–४ मा २० कच्ची र दुई पक्की घर पूर्ण रूपमा क्षतिग्रस्त भएका छन् । थप ११ घर जोखिममा छन् । सो क्षेत्रमा चार गोठ पूर्ण रूपमा भत्किएका छन् भने एक गोठमा आंशिक क्षति पुगेको छ ।
प्रशासनका अनुसार निसीखोला, तमानखोला, बडिगाड र काठेखोला गाउँपालिका तथा ढोरपाटन, गलकोट र बागलुङ नगरपालिकाका विभिन्न क्षेत्रमा बाढीपहिरोले क्षति पुर्याएको छ ।
तमानखोला–३ धमास्कमा दुई घर पूर्ण रूपमा क्षतिग्रस्त भएका छन् । बडिगाड–९ खाल्लेचौरमा १६ घर पूर्ण र १४ घर आंशिक रूपमा क्षतिग्रस्त भएका छन् । वडा नं. ८ भीमगिठेमा तीन घरमा आंशिक क्षति पुगेको छ भने दुई गोठमा क्षति भएको छ ।
ढोरपाटन–७ र १२ मा तीन घर पूर्ण र एक घरमा आंशिक क्षति पुगेको छ । तमानखोला–४ सन्तरमा आठ घर पूर्ण रूपमा क्षतिग्रस्त भएका छन् भने निसीखोला–१ मा तीन घरमा आंशिक क्षति पुगेको प्रमुख जिल्ला अधिकारी आचार्यले जानकारी दिए ।
गलकोट–१ फैरसोतमा बाढीले दुई पक्की र तीन कच्ची घर, दुई होटल तथा रिसोर्ट र एक गोठ पूर्ण रूपमा क्षतिग्रस्त बनाएको छ । बागलुङ नगरपालिका–३ र ९ मा दुई घरमा आंशिक क्षति पुगेको छ । काठेखोला–१, २, ६ र ७ मा एक घर तथा चार गोठमा क्षति पुगेको प्रशासनले जनाएको छ ।
बाढीपहिरोमा परी मृत्यु हुनेमा ताराखोलाका तीन, निसीखोलाका पाँच र तमानखोलाका चार जना छन् । तमानखोलामा पहिरोमा परी एक महिला अझै बेपत्ता रहेको जिल्ला प्रहरी प्रमुख फणिन्द्र प्रसाईंले जानकारी दिए ।
बाढीपीडितलाई निसीखोला गाउँपालिकाको राहत
बाढीपहिरोबाट प्रभावित परिवारलाई निसीखोला गाउँपालिकाले नगद तथा खाद्यान्नसहितको राहत उपलब्ध गराएको छ । गाउँपालिका अध्यक्ष सूर्यबहादुर घर्तीका अनुसार विपद्का कारण मानवीय तथा भौतिक क्षति भएपछि प्रभावित परिवारलाई तत्काल राहत वितरण गरिएको हो ।
गाउँपालिकाले मृतकका परिवार, पूर्ण जोखिममा रहेका परिवार र जोखिममा रहेका परिवारलाई वर्गीकरण गरी आर्थिक सहयोग उपलब्ध गराएको छ । मृतकका परिवारलाई प्रतिव्यक्ति ५० हजार रुपैयाँ, पूर्ण जोखिममा रहेका परिवारलाई ३० हजार रुपैयाँ र जोखिममा रहेका परिवारलाई १० हजार रुपैयाँका दरले राहत दिइएको गाउँपालिकाले जनाएको छ ।
निसीखोलामा बाढीपहिरोमा परी मृत्यु भएका पाँच जनाका परिवारलाई जनही ५० हजार रुपैयाँका दरले राहत दिइएको छ । घर पूर्ण रूपमा क्षतिग्रस्त भएका २४ परिवारलाई जनही ३० हजार र आंशिक क्षति भएका २१ परिवारलाई जनही १० हजार रुपैयाँका दरले आर्थिक सहयोग गरिएको छ ।
निसीखोलामा बाढीपहिरोका कारण पाँच जनाको मृत्यु भएको, २४ घर पूर्ण रूपमा क्षतिग्रस्त भएको तथा २१ घर उच्च जोखिममा रहेको गाउँपालिकाले जनाएको छ । प्रभावित परिवारलाई चामल, त्रिपाललगायत राहत सामग्रीसमेत वितरण गरिएको छ।
