काठमाडौं । नेपाली कांग्रेसका नेता डा. शशांक कोइरालाले १५औँ महाधिवेशनमा सभापति पदमा उम्मेदवारी दिने इच्छा रहेको बताएका छन्। तर डा. शेखर कोइराला सभापतिमा अघि बढे आफूले सहयोग गर्ने उनले स्पष्ट पारे।
शनिबार काठमाडौंमा आयोजित कांग्रेसको संस्थापनइतर पक्षको राष्ट्रिय भेलामा बोल्दै शशांकले आफू पार्टी विभाजन वा नयाँ दल गठनको पक्षमा नरहेको बताए। पार्टीभित्रका मतभेद संवादबाट समाधान गर्दै जनताको चाहनाअनुसार कांग्रेसलाई समयसापेक्ष रूपमा रूपान्तरण गर्नुपर्ने उनको भनाइ छ।
‘सभापति पदका लागि म इच्छुक छु तर मेरो इच्छाले मात्र हुँदैन। साथीहरूसँग परामर्श गरेर उहाँहरूको सुझावअनुसार म निर्णय गर्नेछु,’ उनले भने।
शेखरसँग आफ्नो राम्रो समझदारी रहेको उल्लेख गर्दै उनले शेखर सभापतिको उम्मेदवार बने सहयोग गर्ने बताए।
कांग्रेसले अब सैद्धान्तिक बहसभन्दा विकास र समृद्धिको एजेन्डालाई प्राथमिकता दिनुपर्ने शशांकको भनाइ छ। संविधान प्राप्त भइसकेकाले अब जनताको मुख्य चासो विकास र सुशासनमा रहेको उनले बताए।
‘नयाँ र संगठित कांग्रेसका लागि अबको मूल केन्द्रबिन्दु विकास हुनुपर्छ,’ उनले भने।
