काठमाडौं। नेपाली कांग्रेसका नेता डा. शशांक कोइरालाले पार्टीलाई एकजुट बनाउनु आफ्नो मुख्य कर्तव्य भएको बताएका छन्। कांग्रेस एकताबद्ध भए कसैले पनि पराजित गर्न नसक्ने उनको दाबी छ।
शुक्रवारदेखि सुरु भएको संस्थापनइतर पक्षको राष्ट्रिय भेलालाई सम्बोधन गर्दै कोइरालाले पार्टीभित्र एकता र उत्साह कायम राख्नुपर्ने बताए। संस्थापनइतर समूहको भेलामा बोल्दै उनले पूर्वसभापति शेरबहादुर देउवाको नेतृत्वप्रति समर्थन जनाउँदै देउवाकै उपस्थितिले कार्यक्रम सफल हुने विश्वास व्यक्त गरे।
‘शेरबहादुर जी नै हाम्रो नेता र सभापति हुनुहुन्छ, उहाँकै नेतृत्वमा नेपाली काँग्रेस अगाडि बढ्छ,’ कोइरालाले भने।
उनले लोकतन्त्र पुनःस्थापनापछि तत्कालीन नेता गिरिजाप्रसाद कोइरालाको आग्रहमा लन्डनबाट फर्किएलगत्तै देउवा प्रधानमन्त्री बनेको प्रसंग स्मरण गरे। देउवालाई प्रभावशाली र भाग्यमानी नेता भन्दै उनले पार्टीको नेतृत्वमा देउवाको भूमिकाको प्रशंसा गरे।
सम्बोधनका क्रममा कोइरालाले देउवासँगका पुराना प्रसंग पनि सुनाए। उनका पिता तथा कांग्रेसका संस्थापक नेता बीपी कोइरालाले देउवालाई ‘पश्चिमको राजकुमार’ भन्ने गरेको स्मरण गर्दै उनले बनारसमा रहँदाका अनुभव सुनाएका थिए।
देशभरबाट भेलामा सहभागी कार्यकर्तालाई स्वागत गर्दै कोइरालाले कार्यक्रम व्यवस्थापनमा भएका कमीकमजोरीप्रति क्षमायाचना गरे। पार्टीभित्रको एकताले नै कांग्रेसको भविष्य सुनिश्चित गर्नेमा उनले जोड दिए।
