काठमाडौं। नेपाली कांग्रेसका उपसभापति विश्वप्रकाश शर्माले पार्टी नेतृत्वमा युवा पुस्तालाई स्वीकार गर्न पूर्वसभापति शेरबहादुर देउवालाई आग्रह गरेका छन्।
शुक्रवार पार्टी केन्द्रीय कार्यालय सानेपामा बसेको केन्द्रीय कार्यसम्पादन समितिको बैठकमा बोल्दै शर्माले कांग्रेस अहिले विधि र प्रक्रियामार्फत परिवर्तनको चरणमा रहेको बताए। परिवर्तन र युवा सहभागितालाई विधि तथा पद्धतिअनुसार अघि बढाउनुपर्ने उनको भनाइ थियो।
देउवाको स्वदेश फिर्तीलाई स्वागत गर्दै शर्माले उनले सबै पक्षलाई समेट्ने र पार्टीमा एकताको सन्देश दिने अपेक्षा गरिएको बताए। देउवाले आफ्नो लिखित अभिव्यक्तिमा परिवर्तनलाई आत्मसात गर्ने र युवालाई अघि बढाउने प्रतिबद्धता जनाएकाले त्यसलाई अहिलेको सम्मेलनको केन्द्रमा राखिनुपर्ने शर्माले बताए।
‘५० वर्ष हाराहारीको युवाले पार्टीको नेतृत्व गर्ने कुरालाई पनि सहज रूपमा स्वीकार्नुपर्छ,’ शर्माले भने।
देशको कार्यकारी प्रमुखका रूपमा युवा नेतृत्व स्वीकार्न सक्नेले पार्टी नेतृत्वमा पनि सोही उमेर समूहका व्यक्तिलाई स्वीकार गर्न उदार हुनुपर्ने शर्माको तर्क थियो। विधि र पद्धतिबाट आएको युवा नेतृत्वलाई स्वीकार गर्न नसकिए त्यसले पार्टीभित्र गम्भीर प्रश्न उठाउने उनले बताए।
