काठमाडौं । नेपाली कांग्रेसका सभापति गगनकुमार थापाले आगामी स्थानीय तह निर्वाचनमा देशभरका ७५३ पालिकामध्ये कम्तीमा १०० वटामा महिलालाई प्रमुख पदको उम्मेदवार बनाउने तयारी पार्टीले थालेको बताएका छन्।
नेपाल लोकतन्त्रवादी आदिवासी जनजाति महासंघको दोस्रो राष्ट्रिय सम्मेलनलाई सम्बोधन गर्दै थापाले कांग्रेसलाई पूर्ण समावेशी बनाउँदै सबै समुदायको समान सहभागिता सुनिश्चित गरिने बताए। निर्वाचित जनप्रतिनिधिलाई प्रभावकारी रूपमा शासन सञ्चालन गर्न सक्ने बनाउने उद्देश्यले विशेष प्रशिक्षण कार्यक्रमसमेत सञ्चालन गरिने उनले जानकारी दिए।
स्थानीय र प्रदेश तहमा नेतृत्व लिन इच्छुक तथा योग्य व्यक्तिलाई पहिचान गरी पार्टीको अभियानमा जोड्न उनले महासंघको नेतृत्वलाई आग्रह गरे।
“मेयर, उपमेयर र वडा अध्यक्षका प्रत्यासीलाई प्रशिक्षण दिएर तयार गर्न चाहन्छौं। नेतृत्वका लागि असल नियत मात्र पर्याप्त हुँदैन, सार्वजनिक नीति, सार्वजनिक वित्त र सीमित स्रोत–साधनको प्रभावकारी परिचालनबारे आधारभूत ज्ञान पनि आवश्यक हुन्छ,” थापाले भने।
आगामी निर्वाचनका उम्मेदवार छनोटमा संगठनले सिफारिस गर्ने योग्य र सक्षम व्यक्तित्वलाई प्राथमिकता दिइने पनि उनले बताए।
