काठमाडौं । प्रतिनिधिसभामा आज पनि विपक्षी दलहरूले प्रधानमन्त्री बालेन शाहको सीमा सम्बन्धी अभिव्यक्तिलाई लिएर विरोध जारी राखेका छन्।
शुक्रबार प्रतिनिधिसभाको बैठक सुरु हुनासाथ विपक्षी सांसदहरू उठेर विरोध जनाएका थिए। त्यसपछि सभामुख डोलप्रसाद अर्यालले नेपाली कांग्रेसका सांसद चन्द्रमोहन यादवलाई बोल्न समय दिएका थिए।
कांग्रेसका तर्फबाट धारणा राख्दै यादवले प्रधानमन्त्रीले सीमा विवादसम्बन्धी विवादास्पद अभिव्यक्तिबारे संसद्मा स्पष्ट जवाफ दिनैपर्ने अडान दोहोर्याए।
‘सम्माननीय प्रधानमन्त्रीजीको सीमासम्बन्धी विवादित र आपत्तिजनक अभिव्यक्तिको विषयमा हामीले निरन्तर विरोध गर्दै आएका छौं। हाम्रो अडान यथावत् छ,’ उनले भने।
गत जेठ १७ गते प्रतिनिधिसभामा सांसदहरूको प्रश्नको जवाफ दिने क्रममा प्रधानमन्त्री बालेन शाहले नेपाल–भारत सीमा विवादका विषयमा दुई महत्वपूर्ण टिप्पणी गरेका थिए।
पहिलो, उनले लिपुलेक–लिम्पियाधुरासम्बन्धी विषयमा नेपाल सरकारले भारतलाई कूटनीतिक नोट पठाइसकेको र त्यसको जवाफ प्राप्त भएको जानकारी दिएका थिए। साथै, उक्त विषयमा भारत र चीनसँग मात्रै नभई बेलायत सरकारसँग पनि छलफल गरिएको बताएका थिए। उनका अनुसार ब्रिटिस इन्डियाको समयदेखिको सीमा समस्यामा बेलायतको पनि सरोकार रहेको नेपालको धारणा छ।
दोस्रो, प्रधानमन्त्रीले भारतले नेपालको भूमि अतिक्रमण गरेको मात्र नभई नेपालका तर्फबाट पनि केही स्थानमा भारतीय भूमि प्रयोग भएको जानकारी आफूले प्रधानमन्त्री बनेपछि थाहा पाएको बताएका थिए। उनले दुवै देशले संयुक्त अध्ययन गरेर आपसी समझदारीका आधारमा सीमा समस्या समाधान गर्नुपर्ने धारणा राखेका थिए।
प्रधानमन्त्रीका यी दुवै अभिव्यक्तिले तत्काल विवाद निम्त्याएको थियो। विपक्षी दलहरूले त्यसबारे तथ्यगत आधार माग गर्दै आएका छन्। तर, साढे दुई महिनासम्म पनि प्रधानमन्त्रीले संसद्मा यस विषयमा थप स्पष्टीकरण दिएका छैनन्।
यही विषयलाई लिएर विपक्षी दलहरूले निरन्तर संसद्मा विरोध जनाउँदै आएका छन्। आजको बैठकमा पनि उनीहरूले प्रधानमन्त्रीबाट औपचारिक जवाफको माग गर्दै विरोधलाई निरन्तरता दिएका हुन्।
