काठमाडौं ।नेपाली कांग्रेसका सभापति गगनकुमार थापाले विपद्का समयमा केवल भावना पर्याप्त नहुने भन्दै उद्धार र राहत कार्यलाई प्रभावकारी बनाउन सीप, क्षमता र ज्ञानमा आधारित जनशक्ति आवश्यक पर्ने बताएका छन्। उनले पार्टीका नेता–कार्यकर्तालाई आवश्यक तालिम लिएर सेवाभावका साथ विपद् व्यवस्थापनमा सक्रिय हुन आह्वान गरे।
कांग्रेसको केन्द्रीय नीति, अनुसन्धान तथा प्रशिक्षण प्रतिष्ठानले आयोजना गरेको विपद् व्यवस्थापनसम्बन्धी पूर्वतयारी तथा प्रतिकार्य केन्द्रित प्रशिक्षण कार्यक्रममा बोल्दै थापाले राजनीतिक नेतृत्वका लागि करुणा महत्वपूर्ण गुण भए पनि त्यसलाई व्यवहारमा उतार्न दक्षता अपरिहार्य रहेको उल्लेख गरे।
उनले भने, “विपद्का बेला सहयोग गर्न चाहना मात्र पर्याप्त हुँदैन। ज्ञान, सीप र क्षमताले सम्पन्न जनशक्तिले मात्रै प्रभावकारी रूपमा सेवा गर्न सक्छ। त्यसैले कांग्रेसको नयाँ अभियानमा सहभागी सबैलाई यही विषयमा केन्द्रित भएर सेवाभावका साथ काम गर्न आग्रह गर्दछु।”
कार्यक्रममा कांग्रेसका उपसभापति तथा प्रशिक्षण प्रतिष्ठानका प्रमुख विश्वप्रकाश शर्माले विगतमा विपद्का घटनामा पार्टीले प्रभावकारी भूमिका निर्वाह गर्न नसकेका अनुभव स्मरण गर्दै अब कांग्रेस उद्धार, राहत तथा अन्य सामाजिक कार्यमा संगठित र सक्रिय रूपमा अघि बढ्ने बताए।
