सुनसरी । सुनसरीको देवानगञ्ज गाउँपालिका–३ कप्तानगन्जमा आइतबार राति दुई समुदायबीच भएको झडपमा प्रहरीको गोली लागेर एक जनाको मृत्यु भएको छ।
जिल्ला प्रहरी कार्यालय सुनसरीका अनुसार बोलबम यात्राका क्रममा हिन्दू धर्मावलम्बीहरू कोशी ब्यारेजबाट जल लिएर डिजे बजाउँदै कप्तानगन्ज चोकतर्फ जाँदै थिए। सो क्रममा डिजेको आवाजलाई लिएर अर्को समुदायका केही व्यक्तिले विरोध जनाएपछि विवाद चर्किँदै झडपमा परिणत भएको थियो।
घटनाको जानकारी पाएपछि प्रहरी चौकी कप्तानगन्जबाट प्रहरी निरीक्षक प्रकाशकुमार श्रेष्ठको नेतृत्वमा खटिएको टोलीले दुवै पक्षलाई सम्झाइ–बुझाइ गरी अवस्था नियन्त्रणमा ल्याउने प्रयास गरेको थियो। तर, दुवै समूह आक्रामक बनेपछि स्थिति थप तनावग्रस्त बनेको र भीड नियन्त्रणका लागि प्रहरीले गोली चलाउनुपरेको प्रहरीले जनाएको छ।
जिल्ला प्रहरी कार्यालय सुनसरीका डीएसपी चन्द्र खड्काका अनुसार प्रहरीको गोली लागेर घाइते भएका देवानगञ्ज गाउँपालिका–४ निवासी ३० वर्षीय ओमप्रकाश मेहताको उपचारका लागि विराटनगर लैजाँदै गर्दा बाटोमै मृत्यु भएको हो।
झडपका क्रममा नेपाल प्रहरीतर्फ प्रहरी निरीक्षक राकेश राईसहित ८ जना प्रहरी घाइते भएका छन्। प्रहरी निरीक्षक राईको टाउकोमा चोट लागी ५ टाँका लगाइएको छ भने अन्य घाइते प्रहरीको अवस्था सामान्य रहेको प्रहरीले जनाएको छ। सशस्त्र प्रहरी बलतर्फ पनि ५ जना सुरक्षाकर्मी घाइते भएका छन्।
प्रहरीका अनुसार झडपका क्रममा कप्तानगन्ज बजार क्षेत्रमा रहेका घर, मेडिकल, सवारीसाधन तथा अन्य संरचनामा तोडफोड र आगजनीसमेत भएको छ। घटनापछि क्षेत्रमा सुरक्षा व्यवस्था कडा पारिएको प्रहरीले जनाएको छ।
