काठमाडौं– राष्ट्रिय मानव अधिकार आयोगले भदौ २३ र २४ गतेको प्रदर्शनका क्रममा घाइते भएकाहरूको सम्पूर्ण उपचार तथा औषधि निःशुल्क उपलब्ध गराउने व्यवस्था मिलाउन आग्रह गरेको छ ।
बुधबार सार्वजनिक गरिएको अनुसन्धान प्रतिवेदनमा हालसम्म पनि उपचाररत रहेका तथा जीवनभर वा लामो समयसम्म उपचार गराइरहनुपर्ने वा नियमित औषधि सेवन गर्नुपर्ने भनी दर्तावाला चिकित्सकबाट सिफारिस भएका घाइतेहरूको बाँकी सम्पूर्ण उपचार तथा औषधि निःशुल्क उपलब्ध गराउने व्यवस्था मिलाउनुपर्ने उल्लेख गरिएको छ।
त्यस्तै, जीविकोपार्जनको स्रोत नभएका मृतकका आश्रित परिवार वा परिवारका कम्तीमा एक जना सदस्यलाई रोजगारी वा स्वरोजगारको व्यवस्था गरी उनीहरूको बाँच्न पाउने अधिकारको सम्मान गर्नुपर्ने तथा यस कार्यमा प्रदेश सरकार र स्थानीय तहलाई समेत जिम्मेवार बनाउनुपर्ने माग गरिएको छ ।
यसैगरी, प्रदर्शनका क्रममा अपाङ्गता भई सहयोगी आवश्यक पर्ने घाइतेहरूलाई आजीवन सहयोगी वा सहयोगी भत्तासहित जीवनयापनका लागि आवश्यक आर्थिक स्रोत सुनिश्चित गर्नुपर्ने उल्लेख गरिएको छ ।
