काठमाडौँ । सर्वोच्च अदालतमा हाल देखिएको परिस्थितिप्रति असन्तुष्टि जनाउँदै कानुन व्यवसायीहरूले सांकेतिक विरोध स्वरूप लालटिन बाल्ने कार्यक्रम घोषणा गरेका छन्।
नेपाल बार एसोसिएसनको कार्यसमितिको बैठकले अदालतमा रिट निवेदन दर्ता नै प्रभावित हुने अवस्था बनेको भन्दै त्यसप्रति विरोध जनाउने निर्णय गरेको हो।
बारका अध्यक्ष डा. विजयप्रसाद मिश्रका अनुसार न्यायको खोजीका लागि आवश्यक पर्ने कानुनी प्रक्रियामै अवरोध देखिएको भन्दै त्यसको प्रतीकात्मक विरोध स्वरूप लालटिन बाल्ने कार्यक्रम तय गरिएको छ।
उनका अनुसार मंगलबार दिउँसो १ बजे बारको कार्यालय परिसरमा उक्त कार्यक्रम आयोजना गरिनेछ।
अध्यक्ष मिश्रले न्याय प्राप्तिको आधार नै प्रभावित हुने अवस्था सिर्जना भएमा नागरिकले कहाँबाट न्याय पाउने भन्ने प्रश्न उठ्ने अवस्था आएको बताए। उनले रिट तथा मुद्दा दर्ता प्रक्रिया नै अवरुद्ध भएमा न्याय प्रणालीप्रति जनविश्वास कमजोर हुन सक्ने धारणा व्यक्त गरे।
