काठमाडौं। विभिन्न अदालतमा मुद्दा विचाराधीन रहेका दीपक भट्टको मानव अधिकार र संविधानप्रदत्त मौलिक हक संरक्षणको माग गर्दै उनका बुवा चतुर्भुज भट्टले राष्ट्रिय मानव अधिकार आयोगमा निवेदन दिएका छन्।
चतुर्भुजले शुक्रबार आयोगको पुल्चोकस्थित कार्यालयमा निवेदन दर्ता गराउँदै सञ्चारमाध्यम तथा सामाजिक सञ्जालमा प्रकाशित सामग्रीको सत्यतथ्य छानबिन गर्न र दीपकलाई सिन्धुपाल्चोक कारागारबाट नख्खु कारागारमा फिर्ता ल्याउन सम्बन्धित निकायलाई निर्देशन दिन माग गरेका हुन्।
विभिन्न सञ्चारमाध्यम तथा सामाजिक सञ्जालमा छोरालाई दोषीका रूपमा चित्रण गर्ने, चरित्रहत्या गर्ने र सामाजिक प्रतिष्ठामा आघात पुर्याउने सामग्री प्रकाशित तथा प्रसारित भइरहेको चतुर्भुजको दाबी छ। विशेषगरी पूर्वप्रधानन्यायाधीश चोलेन्द्रशमशेर जबरासँग फोन सम्पर्क गरी विचाराधीन मुद्दामा चलखेल गर्न अनुरोध गरेको भन्ने विषयमा प्रकाशित समाचारप्रति उनले आपत्ति जनाएका छन्। न्यायिक प्रक्रिया जारी रहेका बेला यस्ता सामग्रीले निष्पक्ष सुनुवाइको अधिकारमा असर पार्न सक्ने उनको भनाइ छ।
दीपकलाई गत असोज १७ गते नख्खु कारागारबाट सिन्धुपाल्चोक कारागारमा स्थानान्तरण गरिएको थियो। सरुवाको आधार, कारण र निर्णय प्रक्रियाबारे आफूलाई जानकारी नदिइएको चतुर्भुजले बताएका छन्। दीपकविरुद्ध काठमाडौं जिल्ला अदालत, विशेष अदालत र उच्च अदालत पाटनमा मुद्दा विचाराधीन रहेको उल्लेख गर्दै उनले मुद्दा दायर नभएको जिल्लाको कारागारमा स्थानान्तरण गर्नुको औचित्यमाथि प्रश्न उठाएका छन्।
सरुवाको आधार तथा नख्खु कारागारमा रहँदाको आचरणबारे जानकारी माग्दै नख्खु कारागार र कारागार व्यवस्थापन विभागमा समेत निवेदन दिएको तर जवाफ नपाएको उनले बताएका छन्। सरुवाले विचाराधीन मुद्दाको न्यायिक प्रक्रियामा प्रत्यक्ष वा अप्रत्यक्ष प्रभाव पार्न सक्ने र परिवारलाई मानसिक पीडा पुगेको उनको दाबी छ।
‘मिडिया ट्रायल गराएर असम्बन्धित व्यक्तिहरू, पूर्वप्रधानन्यायाधीशलगायत अन्य व्यक्तिसँग पनि जोडेर मेरो छोरालाई मात्रै प्रताडित गर्ने, दुःख दिने र बदनाम गर्ने हिसाबले प्रचार गरिएको छ,’ चतुर्भुजले भने।
उनले कारागारबाट फोन गरेकोलगायतका विषयमा प्रकाशित समाचारबारे प्रेस काउन्सिल नेपालमा पनि निवेदन दिएको जानकारी दिएका छन्। संविधान, प्रेस काउन्सिल ऐन, २०४८ तथा पत्रकार आचारसंहिता, २०७३ (संशोधनसहित) अनुसार आवश्यक कारबाही हुने अपेक्षा राखेको उनले बताएका छन्।
दीपकलाई थुनामा राख्नुको कारणबारे आफूलाई जानकारी नदिइएको चतुर्भुजको दाबी छ। उनले राष्ट्रिय मानव अधिकार आयोगबाट निवेदनमाथि सुनुवाइ, सत्यतथ्य छानबिन र सम्बन्धित निकायलाई आवश्यक निर्देशन हुने अपेक्षा व्यक्त गरेका छन्।
