काठमाडौँ । राष्ट्रिय स्वतन्त्र पार्टीले सांसदहरूको कार्यक्षमता अभिवृद्धिका लागि स्वकीय सचिवको व्यवस्था गर्न सरकारसँग माग गरेको छ ।
प्रतिनिधि सभामा सरकारको नीति तथा कार्यक्रममाथिको छलफलका क्रममा पार्टीका सहमहामन्त्री तथा सांसद विपिनकुमार आचार्यले सांसदहरूको पेशागत क्षमता विकासमा राज्यले लगानी गर्नुपर्ने धारणा राखेका हुन् ।
उनले सांसदलाई प्रभावकारी रूपमा जिम्मेवारी निर्वाह गर्न आवश्यक सहयोग प्रणाली उपलब्ध गराउनुपर्ने उल्लेख गर्दै नीति तथा कार्यक्रममै यस विषयलाई समेट्न आग्रह गरे ।
आचार्यले सांसदहरूलाई स्वकीय सचिव उपलब्ध गराउने व्यवस्था नै क्षमता अभिवृद्धितर्फको प्रारम्भिक र आवश्यक लगानी हुने बताए ।
