काठमाडौँ । प्रतिनिधि सभामा आकस्मिक समयमा सहभागिता जनाउन चाहने सांसदहरूले बैठक सुरु हुनु अघि नै सभामुखलाई पूर्व सूचना दिनुपर्ने व्यवस्था लागू गरिएको छ।
सभामुख डोलप्रसाद अर्यालले बुधबारको प्रतिनिधि सभा बैठकमै यस सम्बन्धी प्रक्रिया स्पष्ट पार्दै आकस्मिक समयमा बोल्न चाहने सांसदले बैठक प्रारम्भ हुनुअघि नै जानकारी गराउनुपर्ने व्यवस्था रहेको बताएका हुन्।
बैठकका क्रममा आकस्मिक समय सकिएपछि सभामुख शून्य समयमा प्रवेश गर्ने तयारी गरिरहँदा एक सांसदले बोल्ने समय मागेपछि यो विषय उठेको थियो। सभामुखले ती सांसदलाई आकस्मिक समयका लागि पहिले नै सूचना दर्ता भएको छ कि छैन भनेर प्रश्न गरेका थिए।
उनका अनुसार सम्बन्धित सांसदबाट पूर्व सूचना प्राप्त नभएकाले तत्काल आकस्मिक समय उपलब्ध गराउन नसकिने स्थिति बनेको हो। सभामुखले आवश्यक भए आगामी बैठकअघि कार्यव्यवस्था परामर्श समितिमार्फत सूचना दिएर आकस्मिक समय लिन सकिने व्यवस्था रहेको पनि स्पष्ट पारे।
