काठमाडौँ । सरकारले सुविधा शीर्षकमा विभिन्न व्यक्ति तथा निकायले प्रयोग गर्दै आएका ७०१ वटा सरकारी सवारीसाधन फिर्ता ल्याएको जनाएको छ।
प्रधानमन्त्री तथा मन्त्रिपरिषद् कार्यालयका अनुसार हालसम्म ३४ वटा सरकारी निकायबाट सवारीसाधन फिर्ता संकलन गरिएको हो। प्रधानमन्त्री वालेन्द्र शाह (बालेन)को सचिवालयका अनुसार शुक्रबारसम्म उक्त संख्याका गाडी फिर्ता ल्याइएको हो।
तथ्यांक अनुसार सबैभन्दा धेरै सवारी अर्थ मन्त्रालयसँग सम्बन्धित निकायबाट फिर्ता गरिएको छ। उक्त मन्त्रालय अन्तर्गत प्रयोगमा रहेका १२४ वटा गाडी सरकारको नियन्त्रणमा ल्याइएको जनाइएको छ।
त्यसैगरी, सहरी विकास मन्त्रालयसँग सम्बन्धित ७५, भौतिक पूर्वाधार तथा यातायात मन्त्रालयअन्तर्गतका ६४ तथा प्रधानमन्त्री तथा मन्त्रिपरिषद् कार्यालयसँग सम्बन्धित २६ वटा सवारी फिर्ता ल्याइएको छ।
ऊर्जा, जलस्रोत तथा सिँचाइ मन्त्रालय र उद्योग, वाणिज्य तथा आपूर्ति मन्त्रालयबाट समान १६/१६ वटा सवारी फिर्ता गरिएको छ। गृह मन्त्रालयबाट २१, कृषि तथा पशुपन्छी विकास मन्त्रालयबाट २०, रक्षा मन्त्रालयबाट १४ तथा वन तथा वातावरण मन्त्रालयबाट १३ वटा गाडी फिर्ता ल्याइएको विवरण सार्वजनिक गरिएको छ।
यस्तै, भूमि व्यवस्था, सहकारी तथा गरिबी निवारण मन्त्रालयबाट १२, कानुन, न्याय तथा संसदीय मामिला मन्त्रालयबाट ८, परराष्ट्र मन्त्रालयबाट ८, महिला, बालबालिका तथा ज्येष्ठ नागरिक मन्त्रालयबाट ६ तथा खानेपानी मन्त्रालयबाट ५ वटा सवारी फिर्ता गरिएको प्रधानमन्त्री कार्यालयले जनाएको छ।
