काठमाडौँ – राष्ट्रिय स्वतन्त्र पार्टी (रास्वपा) ले आगामी स्थानीय तह निर्वाचनका लागि पार्टीबाट उम्मेदवारी दिन चाहने व्यक्तिले ‘क्यान्डिडेट क्लब’ र ‘लिडरसिप एकेडेमी’ प्रक्रिया पूरा गरी उत्तीर्ण हुनुपर्ने व्यवस्था गर्ने निर्णय गरेको छ।
पार्टी केन्द्रीय कार्यालयमा बसेको सचिवालय बैठकपछि प्रवक्ता मनिष झाले उक्त निर्णयबारे जानकारी दिएका हुन्। उनका अनुसार सम्भावित उम्मेदवारको संख्या बढी हुने अनुमानका कारण छनोट प्रक्रियालाई व्यवस्थित, पारदर्शी र मापदण्डमा आधारित बनाउन यस्तो संरचना अपनाइएको हो।
रास्वपाले उम्मेदवार तयारी तथा मूल्याङ्कनका लागि ‘क्यान्डिडेट क्लब’ गठन गरिसकेको छ। यसअघि बसेको संसदीय दलको बैठकले स्थानीय तह निर्वाचन उम्मेदवार छनोटसम्बन्धी कार्ययोजना तयार पार्दै त्यसको कार्यान्वयनका लागि सम्पादन समिति पनि गठन गरेको थियो।
समितिको संयोजकमा सहमहामन्त्री विपिनकुमार आचार्यलाई जिम्मेवारी दिइएको छ भने सचिवको जिम्मेवारी केन्द्रीय सदस्य रामकुमार (आरके) ढुंगानालाई तोकिएको छ। समितिमा संघीय सांसदसहित थप पाँच सदस्य समावेश छन्।
रास्वपाले आगामी स्थानीय तह निर्वाचनको तयारी समयमै सुरु गरेको जनाएको छ। २०७९ वैशाखमा सम्पन्न स्थानीय निर्वाचनबाट निर्वाचित जनप्रतिनिधिको पाँचवर्षे कार्यकाल २०८४ मा समाप्त हुने भएकाले त्यसअघिको रणनीतिक तयारी अहिलेबाटै अघि बढाइएको पार्टीको भनाइ छ।
पार्टीले स्थानीय तह र प्रदेश सभा निर्वाचनलाई समन्वित रूपमा तयारी गर्ने लक्ष्यसहित संगठन, नेतृत्व विकास र उम्मेदवार छनोट प्रक्रिया अघि बढाएको जनाएको छ।
