काठमाडौँ । गौमुखी गाउँपालिकामा चट्याङ लागेर दुई जनाको ज्यान गएको छ भने चार जना घाइते भएका छन्।
गौमुखी गाउँपालिका-६ लिवाङमा बाबु-छोराको चट्याङ लागेर मृत्यु भएको जिल्ला प्रहरी कार्यालय प्यूठानले जनाएको छ।
मृत्यु हुनेमा ७० वर्षीय केदार बोहोरा क्षेत्री र २६ वर्षीय रामु बोहोरा क्षेत्री रहेका छन्। दुवै जनाको शव जिल्ला अस्पतालमा राखिएको र सोमबार बिहान पोस्टमार्टम गरिने अस्पताल स्रोतले जानकारी दिएको छ।
घटनामा सोही गाउँपालिकाका अन्य दुई जना पनि घाइते भएका छन्। गौमुखी-४ की २४ वर्षीया सिर्जना न्यौपाने र गौमुखी–६ की ५४ वर्षीया गमी बोहोराको जिल्ला अस्पताल विजुवारमा उपचार भइरहेको छ।
त्यसैगरी, शनिबार दिउँसो माण्डवी गाउँपालिका-२ रातापानीमा पनि चट्याङ लाग्दा दुई दिदीबहिनी घाइते भएका थिए। २० वर्षीया कल्पना अधिकारी र १६ वर्षीया सपना अधिकारीको अहिले जिल्ला अस्पताल विजुवारमा उपचार जारी रहेको स्वास्थ्य स्रोतले जनाएको छ।
चट्याङका छुट्टाछुट्टै घटनापछि जिल्लामा मानवीय क्षति र घाइतेको संख्या बढेपछि स्थानीय प्रशासनले सतर्कता अपनाउन आग्रह गरेको छ।
