काठमाडौँ – प्रधानमन्त्री वालेन्द्र शाह ‘बालेन’ले संघीय संसदमा समानुपातिक प्रणालीमार्फत प्रतिनिधित्व गर्ने विभिन्न दलका सांसदहरूसँग विस्तृत छलफल गरेका छन्।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा करिब पाँच घण्टासम्म चलेको उक्त बैठकमा सांसदहरूले आफ्ना क्षेत्रगत तथा समूहगत समस्या, चुनौती र समाधानका सम्भावित उपायहरू प्रस्तुत गरेका थिए।
छलफलमा विभिन्न क्लस्टरका प्रतिनिधित्वसँग सम्बन्धित विषयमा केन्द्रित भएर सुझाव तथा धारणा आदान-प्रदान गरिएको जनाइएको छ।
उक्त छलफलमा सहभागी राष्ट्रिय स्वतन्त्र पार्टी (रास्वपा) की सांसद आकृति अवस्थीले कार्यक्रमको मुख्य उद्देश्य विभिन्न समूहबीच अनुभव आदान-प्रदान गर्दै समानुपातिक प्रतिनिधित्वलाई अझ प्रभावकारी बनाउनु रहेको बताइन्।
उनका अनुसार प्रधानमन्त्रीले राजनीतिक दलगत सीमाभन्दा माथि उठेर सबै क्लस्टरका सरोकारहरूलाई राष्ट्रिय दृष्टिकोणबाट सुनेका छन्।
साथै, विद्यमान नीतिगत व्यवस्थालाई निरन्तरता दिँदै आवश्यक सुधारतर्फ सरकार अघि बढ्ने संकेत पनि बैठकबाट प्राप्त भएको उनले उल्लेख गरिन्।
