काठमाडौं – नेपाली कांग्रेसले समानान्तर गतिविधिमा सक्रिय रहेको भन्दै पूर्व कार्यवाहक सभापति पूर्णबहादुर खड्कालाई कारबाही गर्ने भएको छ । खड्काले कार्यवाहक सभापतिकै हैसियतमा दोस्रोपटक वक्तव्य जारी गरेपछि कांग्रेसले कारबाहीको तयारी गरेको हो ।
कांग्रेसको केन्द्रीय कार्यसम्पादन समितिको बैठक बुधबार २ बजे सानेपामा बस्दैछ । त्यसअघि ११ बजे नै बस्ने केन्द्रीय अनुशासन समितिको बैठकले खड्कालाई कारबाही गर्नेबारे निर्णय लिनेछ ।
अनुशासन समितिले यसअघि नै खड्कालाई कार्यवाहक सभापतिको हैसियतमा पार्टीको लेटरहेड दुरुपयोग नगर्न सचेत गराउन निर्णय गरेको थियो । नयाँ सरकार बनेलगत्तै पूर्वगृहमन्त्री रमेश लेखक पक्राउको विरुद्धमा खड्काले कांग्रेसको लेटरहेड प्रयोग गर्दै वक्तव्य जारी गरेका थिए । कार्यवाहक सभापतिकै हैसियतमा खड्काले वक्तव्य जारी गरेपछि कांग्रेसमा उनलाई कारबाही गर्नेबारे दुई साताअघि नै चर्चा भएको थियो ।
केन्द्रीय अनुशासन समितिको चैत १८ गतेको बैठकले खड्काको नाम उल्लेख नगरीकनै अब उप्रान्त लेटरहेड दुरुपयोग भए नेपाली कांग्रेसको विधान,२०१७ (संशोधनसहित) र पचलित नेपाल कानुन बमोजिम कारबाही प्रक्रिया अगाडि बढाउने निर्णय गरेको थियो ।
‘नेपाली कांग्रेसको नक्कली लेटरप्याड बनाई आफूसँग नभएको जिम्मेवारी उल्लेख गर्दै आफू पार्टीको जिम्मेवारीमा छु भनी मिति २०८२ चैत १४ गते अनधिकृत वक्तव्य जारी गर्ने कार्य गलत भएकोले सचेत गराइन्छ’, यसअघि अनुशासन समितिले भनेको थियो । अब भने खड्काबारे निर्णय लिने मनस्थितिमा अनुशासन समिति पुगेको छ ।
