काठमाडौँ – राष्ट्रिय प्रजातन्त्र पार्टी (राप्रपा)भित्रको असन्तुष्ट पक्षले अध्यक्ष राजेन्द्र लिङ्देन नेतृत्वको केन्द्रीय कार्यसमिति भंग गरी नयाँ संरचना गठन गर्न माग गरेको छ।
महामन्त्री धवलशमशेर राणा पक्षधरको आइतबार कान्तिपथमा बसेको बैठकले वर्तमान कार्यसमिति भंग गरी निष्पक्ष व्यक्तिको संयोजकत्वमा महाधिवेशन आयोजक समिति गठन गर्नुपर्ने निर्णय गरेको हो। साथै, केन्द्रीय महाधिवेशनको मिति एक हप्ताभित्र घोषणा गर्न माग गरिएको छ।
बैठकले पार्टीको वर्तमान अवस्थाबारे समीक्षा गर्दै संगठनात्मक संकटबारे चिन्ता व्यक्त गरेको जनाएको छ। महाधिवेशनमार्फत नयाँ जनादेश प्राप्त गर्नु आवश्यक रहेको निष्कर्ष निकालिएको छ। बैठकपछि जारी धारणा अनुसार, ‘केन्द्रीय महाधिवेशनबाट ताजा जनादेश प्राप्त गर्नुबाहेक उत्तम विकल्प राप्रपासँग छैन । केन्द्रीय कार्यसमितिको नियमित चार वर्षे कार्यकाल सम्पन्न भएर पार्टी हाल अतिरिक्त अवधिमा छ । पार्टीले म्याद थप गर्ने निर्णय गर्दा २०८३ जेठभित्र महाधिवेशन सम्पन्न गर्ने निर्णय भएको जगजाहेर छ ।’
निर्वाचन परिणामबारे पनि असन्तुष्ट पक्षले समीक्षा गर्दै पार्टी नेतृत्वमाथि प्रश्न उठाएको छ। निर्वाचनअघि व्यक्त गरिएका अपेक्षा र प्राप्त परिणामबीच अन्तर रहेको उल्लेख गर्दै उनीहरूले भनेका छन्, ‘मलाई खेल्न दिनुहोस्, राप्रपालाई देशको पहिलो पार्टी बनाउँछु भन्नुभएको थियो, पार्टीको पक्षमा अकल्पनीय नतिजा प्राप्त हुने बताउनुभएको थियो । निश्चितरुपमा नतिजा त अकल्पनीय नै प्राप्त भयो तर, नकरात्मक रूपमा ।’
बैठकले निर्वाचनपछिको समीक्षा पर्याप्त नभएको र नेतृत्वले नैतिक जिम्मेवारी नलिएको विषय उठाएको छ। पार्टीभित्र निर्णय प्रक्रियामा विधि, पद्धति र आन्तरिक परामर्शको अभाव रहेको आरोप पनि लगाइएको छ।
उपसभामुख पदका लागि उम्मेदवारी दिने निर्णयप्रति पनि असन्तुष्टि व्यक्त गरिएको छ। उक्त विषयमा केन्द्रीय समिति वा कार्यसम्पादन समितिमा पर्याप्त छलफल नभएको भन्दै आपत्ति जनाइएको छ। असन्तुष्ट पक्षले यसलाई पार्टीभित्रको प्रक्रियागत कमजोरीसँग जोडेर व्याख्या गरेको छ।
पार्टीभित्रको आन्तरिक मतभेद सार्वजनिक रूपमा देखिँदा संगठनात्मक एकता, आगामी रणनीति र नेतृत्व संरचनामा प्रभाव पर्ने देखिएको छ।
