काठमाडौँ – नेकपा एमालेका महासचिव शंकर पोखरेलले चुनावी परिणाममा देखिने अल्पकालीन उत्साह वा ‘लहर’ले मात्रै दीर्घकालीन राजनीतिक सफलता सुनिश्चित नगर्ने बताएका छन्।
सामाजिक सञ्जालमार्फत आफ्नो धारणा सार्वजनिक गर्दै उनले एकपटकको उल्लेखनीय जितलाई स्थायी राजनीतिक उपलब्धिसँग जोडेर हेर्न नहुने उल्लेख गरेका हुन्। नेपालको सन्दर्भमा चर्चित ‘बालेन लहर’लाई उदाहरणका रूपमा प्रस्तुत गर्दै उनले अन्तर्राष्ट्रिय अनुभवसँग तुलना गरेका छन्।
पोखरेलले भारतको सन् १९८४ को आम निर्वाचन स्मरण गर्दै त्यतिबेला राजीव गान्धी नेतृत्वको कांग्रेस (आई) ले अत्यधिक जनसमर्थन प्राप्त गरे पनि पछिल्ला वर्षहरूमा क्रमशः कमजोर बन्दै गएको बताए। त्यही समयमा भारतीय जनता पार्टी विस्तारै सशक्त बन्दै अघि बढेको र हाल नरेन्द्र मोदीको नेतृत्वमा निरन्तर सत्तामा पुग्नुले दीर्घकालीन सफलताको आधार फरक हुने संकेत गरेको उनको भनाइ छ।
उनका अनुसार दीर्घकालीन राजनीतिक सफलता संगठनको सुदृढीकरण, प्रभावकारी कार्यसम्पादन र निरन्तर जनसमर्थनमा निर्भर हुन्छ। केवल चुनावी माहोल वा एकपटकको जितले राजनीतिक स्थायित्व सुनिश्चित गर्न सक्दैन।
नेपालको सन्दर्भमा पनि यही शिक्षा लागू हुने उल्लेख गर्दै उनले जनअपेक्षा पूरा गर्ने क्षमता, संस्थागत मजबुती र निरन्तर समर्थन कायम राख्ने रणनीतिलाई प्राथमिकतामा राख्नुपर्ने बताएका छन्।
पोखरेलले यस्तो विश्लेषण जित्ने र हार्ने दुवै पक्षका लागि मार्गदर्शक बन्न सक्ने निष्कर्ष समेत प्रस्तुत गरेका छन्।
