काठमाडौँ । राष्ट्रिय स्वतन्त्र पार्टीका सभापति रवि लामिछानेले चुनावी कार्यक्रमका क्रममा गरिब तथा विपन्न समुदाय लक्षित विस्थापनको आशंका फैलाइएको भन्दै त्यसप्रति आपत्ति जनाएका छन्। उनले पार्टीको नीति कमजोर वर्गको आवास हटाउने नभई भ्रष्टाचारबाट आर्जित सम्पत्तिमाथि कडाइ गर्ने रहेको स्पष्ट पारे।
चुनावी प्रतिबद्धता पत्र सार्वजनिक कार्यक्रमलाई सम्बोधन गर्दै उनले अव्यवस्थित बस्ती हटाउने विषयलाई लिएर नागरिकमा डर पैदा गर्ने प्रयास भइरहेको उल्लेख गरे। राज्यको प्राथमिकता गरिब समुदायको व्यवस्थापन र संरक्षण हुने तथा कानुन विपरीत आर्जित सम्पत्तिमाथि मात्र कडा कदम चालिने उनले बताए ।
उक्त अवसरमा उनले मतदातासँग पार्टीका उम्मेदवारलाई समर्थन गर्न आग्रह गर्दै आगामी पाँच वर्षको अवधिमा अपेक्षित काम गर्न नसके राजनीतिक रूपमा जिम्मेवारी लिन तयार रहने धारणा पनि व्यक्त गरेका छन्।
