काठमाडौँ । पृथ्वी राजमार्गअन्तर्गत नागढुंगा-मलेखु ११ किलोमिटर खण्ड कालोपत्रे सम्पन्न भएको छ । गत वर्ष आठ किलोमिटर कालोपत्रे भएकामा यस वर्ष थप तीन किलोमिटरमा कालोपत्रे भएको हो ।
नागढुंगा-मुग्लिन सडक आयोजनाका इन्जिनियर विजय दरैका अनुसार तेस्रो चरणअन्तर्गत हालसम्म ४० प्रतिशत अर्थात कुरिनटार, फिस्लिङ, चरौदी र विशालटारका केही क्षेत्र कालोपत्रे भएका छन् ।
धादिङको बाँदरेमा कालोपत्र जारी छ भने फिस्लिङ र जवाङ खोला क्षेत्रमा बेस र सबबेस राखिएको छ । उक्त खण्डका ६ वटा पुलमध्ये हुग्दी र चरौदीमा जमिनमाथिको काम भइरहेको छ । निर्माण सामाग्री अभाव नहोस् भन्नेमा आफूहरू रहेको उनले बताए ।
धादिङको चरौदी र बेनिघाट एवं इच्छाकामनाबाट सामाग्री लगिएको भए पनि लामो समयका लागि काम गर्न सामाग्री अभाव हुने आशंका उनले व्यक्त गरे ।
विश्व बैंकको ऋण सहयोग चार अर्ब ८० करोड ५९ लाख मा ३८ किलोमिटर लामो यो सडक खण्ड स्तरोन्नति थालिएको हो ।
