काठमाडौं । जिल्ला प्रशासन कार्यालय काठमाडौंले त्रिभुवन अन्तर्राष्ट्रिय विमानस्थल हाताभित्र एक महिनाका लागि निषेधाज्ञा जारी गरेको छ। फागुन १ गते विमानस्थल र आसपास क्षेत्रमा प्रदर्शन गर्ने घोषणा भएपछि बिहीबारदेखि लागू हुने गरी आदेश जारी गरिएको हो।
आदेशअनुसार गोल्डेन गेटदेखि विमानस्थल परिसरभित्रका सम्पूर्ण सडक, आन्तरिक तथा अन्तर्राष्ट्रिय टर्मिनल, पार्किङ क्षेत्रलगायत स्थानमा पाँच जनाभन्दा बढी व्यक्ति भेला भई अनसन, धर्ना, घेराउ, जुलुस, प्रदर्शन तथा सभा गर्न निषेध गरिएको छ। प्रमुख जिल्ला अधिकारी ईश्वरराज पौडेलद्वारा जारी आदेशमा विमानस्थलजस्तो संवेदनशील क्षेत्रमा भीडबाट तोडफोड र आगजनीजस्ता गतिविधि हुन सक्ने उल्लेख छ।
प्रशासनले निषेधित क्षेत्रबाहेक संविधानअनुसार शान्तिपूर्ण भेला र अभिव्यक्तिको अधिकार कायम रहने स्पष्ट गरेको छ। साथै, पूर्वजानकारीसहित गरिने कार्यक्रमबाट सरकारी, सार्वजनिक वा व्यक्तिगत सम्पत्तिमा क्षति पुगेमा आयोजकबाट क्षतिपूर्ति असुल गरिने चेतावनी पनि दिइएको छ।
