काठमाडौँ । झापा-५ निर्वाचन क्षेत्रअन्तर्गत दमक क्षेत्रमा राष्ट्रिय स्वतन्त्र पार्टीले मतदाता भेटघाट तथा घरदैलो कार्यक्रमलाई निरन्तरता दिएको छ। उम्मेदवार बालेन्द्र साह (बालेन) मनोनयन दर्तापछि केही दिन क्षेत्रमै बसेर फर्किएपछि हाल पार्टीका स्थानीय नेता तथा कार्यकर्ताले अभियान अघि बढाइरहेका छन्।
पार्टीका अनुसार सोमबार बिहान दमक-९ को उराव बस्तीबाट सुरु गरिएको घरदैलो कार्यक्रम पाणिनी स्कुल, देवसिंह टोल, नौभाइ चोक र बुद्ध चोक हुँदै पुनः उराव बस्तीमै पुगेर टुंगिएको थियो। सो क्रममा पार्टी प्रतिनिधिहरूले स्थानीय बासिन्दासँग प्रत्यक्ष संवाद गर्दै क्षेत्रका समस्या, गुनासा र सुझाव संकलन गरेका छन्।
घरदैलो अभियानमा महिला तथा युवा सदस्यहरूको सक्रिय सहभागिता देखिएको छ। उम्मेदवारका पक्षमा मत माग्न उनकी पत्नी सविना साह पनि दमकमा उपस्थित भई अभियानमा सहभागी भएको पार्टीले जनाएको छ।
यसैक्रममा दिउँसो ३ बजेदेखि कमल गाउँपालिका-५ को पाडाजुगी चोकबाट अर्को घरदैलो कार्यक्रम सञ्चालन गर्ने तालिका तय गरिएको छ। कार्यक्रम पाडाजुगी चोकबाट उत्तरतर्फ गुहेश्वरी टोल, टुक्रे र सशस्त्र चेकपोष्ट हुँदै दक्षिणतर्फ पाथीभरा टोल र अम्बिका चोक पार गर्दै मंगलबारे बजारमा पुगेर समापन गर्ने योजना रहेको पार्टीले जानकारी दिएको छ।
