काठमाडौँ- राष्ट्रिय प्रजातन्त्र पार्टीका नेता तथा काठमाडौँ निर्वाचन क्षेत्र नम्बर ५ का प्रतिनिधि सभा उम्मेदवार कमल थापाले हिन्दूराष्ट्र र राजसंस्थाको पुनर्स्थापना नभएसम्म सत्तामा सहभागी हुने उद्देश्य पार्टीको नरहेको बताएका छन्।
शनिबार काठमाडौँमा आयोजित एक कार्यक्रममा मन्तव्य व्यक्त गर्दै उनले राप्रपाको राजनीतिक दृष्टिकोण सत्ता केन्द्रित नभई नीतिगत र वैचारिक मुद्दामा आधारित रहेको स्पष्ट पारे। उनका अनुसार पार्टीको प्राथमिकता शासन सत्ता भन्दा पनि राष्ट्रिय पहिचान र राज्य संरचनासँग जोडिएका विषयहरू हुन्।
थापाले राजालाई मतदाता रहेको निर्वाचन क्षेत्रबाट निर्वाचित हुनु आन्तरिक मात्र नभई अन्तर्राष्ट्रिय तहमा समेत सन्देश दिने महत्वको विषय हुने दाबी गरे। काठमाडौँ क्षेत्र नम्बर ५ मा हिन्दूराष्ट्र र राजसंस्थाको पक्षमा उभिने राष्ट्रवादी मतदाताको उल्लेख्य उपस्थिति रहेको उनको भनाइ थियो।
उनका अनुसार ती मतदाताको समर्थनलाई संगठित रूपमा मतदानमा रूपान्तरण गर्न सके चुनावी जित सुनिश्चित हुनसक्ने धारणा उनले व्यक्त गरेका छन्।
