काठमाडौं – पूर्वप्रधानमन्त्री डा. बाबुराम भट्टराईले गोरखा–२ बाट दिएको उम्मेदवारी फिर्ता लिएका छन्। फिर्ताको घोषणा गर्दै उनले आगामी निर्वाचनमा देशले आवश्यक ठानेको व्यक्तिलाई सहयोग गर्ने आफ्नो प्रतिबद्धता व्यक्त गरे।
भट्टराईले शुक्रबार भने, “म आगामी दिनमा देशले चाहेको अनुसारकै व्यक्तिलाई सहयोग गर्ने प्रतिबद्ध छु। प्रस्तावक र समर्थक साथीहरूलाई हार्दिक धन्यवाद व्यक्त गर्न चाहन्छु।”
उनले उम्मेदवारी फिर्ता लिने निर्णय विभिन्न व्यक्ति र दलको आग्रहपछि लिएको बताए। भट्टराईले थपे, “देशको वर्तमान राजनीतिक अवस्था अझै स्थिर छैन। यसै परिस्थिति हेर्दा म बाहिर रहेर अभिभावकीय भूमिका निर्वाह गर्दा देश र दल दुवैका लागि लाभदायी हुन्छ।”
उनले आफ्नो निर्णयको सन्दर्भमा जीवनभरको अभिष्ट संघीय लोकतान्त्रिक गणतन्त्रको प्रगति भएको उल्लेख गर्दै भने, “देशमा तीव्र आर्थिक विकास र समृद्धिको आधार तयार पार्न सबैको आग्रहअनुसार म बाहिरबाटै दलहरूलाई सहयोग गर्ने निर्णयमा पुगेको छु।”
यसअघि राष्ट्रिय स्वतन्त्र पार्टी (रास्वपा) ले उनलाई उम्मेदवारी फिर्ता गर्न आग्रह गरेको थियो। रास्वपाले यस क्षेत्रमा महामन्त्री कविन्द्र बुर्लाकोटीलाई चुनावी मैदानमा उतारेको छ। बुर्लाकोटीले यसअघि पनि यही क्षेत्रमा चुनाव लडेर नेकपा अध्यक्ष पुष्पकमल दाहाल ‘प्रचण्ड’लाई पराजित गरेका थिए।
स्रोतका अनुसार, प्रचण्डले पनि बाबुरामलाई फोन गरेर उम्मेदवारी फिर्ता लिन अनुरोध गरेका थिए। यस चुनावमा नेपाली कम्युनिस्ट पार्टीबाट लेखनाथ न्यौपाने उम्मेदवार छन्।
