काठमाडौँ। विहार विधान सभा निर्वाचनको २ दिनअघि नै नेपाल भारत सीमा क्षेत्र बन्द गरिएको छ । चुनावका बेला गडबडी फैलिने सूचनापछि सुरक्षा एजेन्सीले नेपाल-भारत बोर्डर हाइ अलर्टमा राखेको र ३ देखि ७ नम्बरको सीमा पूरै सिल गरिएको भारतीय समाचार एजेन्सीहरूले जनाएका छन् ।
विहार विधान सभाको निर्वाचनका लागि नोभेम्बर ६ अर्थात् बिहीबार मतदान हुँदै छ । भारतको सबैभन्दा ठूलो प्रान्तमध्येको विहार चुनावले सिंगो देशको राजनीतिक उथलपुथल समेत गर्ने भएकाले अहिले भारतीय सत्ता राजनीतिका हस्तिहरू विहार केन्द्रित छन् । प्रधानमन्त्री नरेन्द्र मोदी र विपक्षी दलका नेता राहु गान्धीले विहारमै डेरा जमाएका छन् ।
विहारमा लामो समयदेखि मुख्यमन्त्री चलाइरहेका जनता दल युनाइडेटका नेता नितिशकुमार फेरि एक पटक सोही पदको प्रतिस्पर्धामा छन् । उनलाई नरेन्द्र मोदीको भारतीय जनता पार्टी र रामविलाश पासवानका छोरा चिराग पासवानलगायतको साथ छ ।
टाइम्स अफ इण्डियाका अनुसार पछिल्लो मत सर्वेक्षणमा मुख्यमन्त्री पदमा व्यक्तिगतरूपमा जनताको पहिलो रोजाईमा परेका छन् लालु यादवका छोरा तेजस्वी यादव । उनको पक्षमा ३३ प्रतिशत जनताले मत दिँदा नितिश कुमारको पक्षमा २६ प्रतिशतको सर्वेक्षण छ ।
तर गठबन्धनको हिसाबले बिजेपी र नितिश गठबन्धनको धेरै सिट आउने प्रक्षेपण गरिएको छ । भाजपा एक्लैले ७० देखि ८१ सिट जित्दा नितिशको पार्टीले ४१ देखि ४८ सिट जित्ने प्रक्षेपण छ । यो मत सर्वेक्षण २ दिनअघिको हो ।
उता काँग्रेस, कम्युनिस्ट र लालु यादवका छोरा तेजश्वी यादव नेतृत्वको जनता दल युनाइडे पछिल्लो सर्वेक्षणमा केही सिट पछाडि छ । यो गठबन्धनबाट तेजश्वीको पार्टीले ७० देखि ७८ सिट र कम्युनिस्ट पार्टीका तीनवटा घटकले १२ देखि १७ सिट तथा काँग्रेस आइले पनि त्यसकै हाराहारीमा जित्ने सर्वेक्षण छ ।