काठमाडौं। नेपाली काँग्रेसकी प्रमुख सचेतक बासना थापाले कर्णाली र मधेसका पछाडि पारिएका वर्गसँगै युवा र महिलाको आवाज पार्टीको नीति निर्माण तहमा पुर्याउन आफूले केन्द्रीय सदस्यमा उम्मेदवारी दिएको बताएकी छन्।
बिहीबार पार्टीको १५औँ महाधिवेशनस्थलमा सञ्चारकर्मीसँग कुरा गर्दै खुला महिलातर्फ केन्द्रीय सदस्यमा उम्मेदवारी दिएकी थापाले पार्टीभित्रका सांगठनिक चुनौती चिर्दै काँग्रेसलाई थप गतिशील बनाउन आफ्नो उम्मेदवारी महत्वपूर्ण हुने बताइन्।
उनले पार्टीमा युवाको सहभागिता बढ्दै गएको उल्लेख गर्दै उनीहरूलाई पार्टीको पद्धति र अग्रजको अनुभवसँग जोडेर अघि बढाउनु अहिलेको मुख्य चुनौती रहेको बताइन्। पछिल्ला निर्वाचनमा काँग्रेसले व्यहोरेको पराजयलाई सत्तामुखी चरित्रभन्दा मतदाताको नयाँ विकल्प परीक्षण गर्ने चाहनाका रूपमा बुझ्नुपर्ने उनको धारणा छ।
गगन थापाको नेतृत्वमा युवाप्रति आकर्षण बढेको उल्लेख गर्दै उनले महाधिवेशन प्रतिनिधिलाई सक्षम र दूरदृष्टि भएको नेतृत्व चयन गर्न आग्रह गरिन्। आन्तरिक निर्वाचनको प्रतिस्पर्धाले संगठनलाई कमजोर नभई थप सुदृढ बनाउने उनको भनाइ छ।
अग्रजको अनुभव र युवाको उत्साहलाई समेटेर पार्टीलाई एकताबद्ध बनाउँदै अघि बढ्ने प्रतिबद्धता पनि उनले व्यक्त गरिन्।
