काठमाडौँ। नेपाली कांग्रेसका नेता शंकर तिवारीले विशेष महाधिवेशनपछि पनि पार्टीमा अपेक्षाअनुसार रुपान्तरण हुन नसकेको बताएका छन्। उनले अब कांग्रेसमा ‘रुपान्तरणको पनि रुपान्तरण’ आवश्यक रहेको बताए।
बुधबार काठमाडौंमा आयोजित पत्रकार सम्मेलनमा कांग्रेसको १५औँ महाधिवेशनमा महामन्त्री पदमा उम्मेदवारी दिएका तिवारीले विशेष महाधिवेशनपछि पनि पार्टी ‘रनवेमा अड्किएको’ टिप्पणी गरे। पूर्ण महाधिवेशनपछि कांग्रेसलाई नयाँ दिशामा अघि बढाउनुपर्ने उनको भनाइ छ।
उनले भने, ‘हामीले विशेष महाधिवेशनबाट रुपान्तरणको कुरा गर्यौँ, तर भनेअनुसार रुपान्तरण हुन सकेन। मेरो पहिलो एजेन्डा रुपान्तरणको पनि रुपान्तरण हो।’
तिवारीले सभापतिको नेतृत्व बलियो बनाउनुपर्ने बताए। सभापतिको हात बलियो बनाउनुको अर्थ व्यक्तिगत रूपमा साथ दिनु नभई सही नीति निर्माणमा सहयोग गर्ने र त्यसलाई कार्यकर्ता तथा जनतासम्म पुर्याउनु भएको उनले बताए।
कांग्रेसका नयाँ महाधिवेशन प्रतिनिधिमध्ये करिब ७० देखि ७२ प्रतिशत नयाँ रहेको र अधिकांश ४५ वर्षमुनिका रहेको उल्लेख गर्दै उनले केन्द्रीय पदाधिकारीमा युवा आवाज सुनिश्चित गर्नुपर्ने बताए। सभापतिसँगै बसेर सल्लाह दिन सक्ने युवा नेतृत्व केन्द्रीय पदाधिकारीमा हुनुपर्ने उनको भनाइ थियो।
तिवारीले महामन्त्री पदलाई पार्टी रुपान्तरणका लागि ‘स्टेपिङ स्टोन’का रूपमा लिएको बताए। बीपी कोइरालाले आफ्ना कार्यक्रम आफैँ बनाएर कार्यान्वयनमा लैजाने गरेको उल्लेख गर्दै उनले आफूले पनि पार्टीलाई नयाँ कार्यक्रमसहित अघि बढाउन चाहेको बताए। महाधिवेशन प्रतिनिधिमा रहेको असन्तुष्टि र छटपटीलाई राजनीतिक एजेन्डा र गन्तव्य दिन उम्मेदवारी दिएको उनको भनाइ छ।
महामन्त्रीको उम्मेदवारीबाट पछि नहट्ने स्पष्ट पार्दै तिवारीले आफू आफ्नै बल र देशभरका कार्यकर्ताको समर्थनमा चुनावी मैदानमा रहेको बताए।
‘म मेरो दममा खडा भएको छु, देशभरिका कार्यकर्ताहरू साथीहरूको दममा खडा भएको छु, म अन्तिमसम्म जंगमा रहन्छु र विजयी भएर आउनेछु। मैले फिर्ता गर्ने कुरा छैन,’ उनले भने।
पार्टीको केन्द्रीय कार्यसमितिमा नरहे पनि नीतिगत विषय र पार्टीका निर्णय कार्यान्वयनका सन्दर्भमा निरन्तर बहस तथा पैरवी गर्दै आएको तिवारीले बताए। आफू ‘टेस्टेड’ नभएकाले नयाँ नेतृत्वलाई अवसर दिनुपर्ने उनको तर्क छ। कांग्रेसको इतिहासमा पदाधिकारी दोहोर्याउने अभ्यास नरहेको उल्लेख गर्दै उनले आफूले त्यसको ‘शंकाको सुविधा’ पाउनुपर्ने बताए।
