काठमाडौं । नागरिक उन्मुक्ति पार्टी, नेपालका संस्थापक एवं संरक्षक रेशमलाल चौधरीले नयाँ पुस्ताका नेताहरूबाट पनि देश निर्माणको स्पष्ट संकेत नदेखिएको भन्दै चिन्ता व्यक्त गरेका छन् ।
नेपाली कांग्रेसको १५औँ महाधिवेशनअन्तर्गत जारी उद्घाटन समारोहलाई सम्बोधन गर्दै चौधरीले विगतमा कपाल फुलेका नेताहरूले देश बिगारेको आरोप लाग्ने गरे पनि अहिलेका युवा नेताहरूले समेत अपेक्षाअनुसार काम गर्न नसकेको टिप्पणी गरे ।
उनले कांग्रेस सभापति गगन थापातर्फ संकेत गर्दै भने, ‘गगन जी, तपाईं आज संयोगले अगाडि हुनुहुन्छ । म त तपाईंलाई विश्वास गर्ने मान्छे हुँ । दुःख माने मान्नुस्, नमाने नमान्नुस् । हिजो सबै कपाल फुलेर आफूलाई युवा हुँ भन्ने नेताहरूले देश बिगारे । अहिले कैला जुंगा भएका, पूरै कपाल काला भएकाहरूले पनि देश बनाउने छनक देखाएका छैनन् ।’
चौधरीले अब गगन थापालगायत आधाआधि कपाल फुलेको पुस्ताले देश बनाउने विश्वास व्यक्त गरे ।
‘अब आधाआधि कपाल फुलेको, गगनजीको जस्तो १०–२० वटा दाह्री फुलेको, ५०–६० वटा कपाल फुलेको यो नेताले देश पक्कै बनाउँछ भन्ने विश्वास छ,’ उनले भने ।
