काठमाडौँ– नेपाली कांग्रेसको १५औँ महाधिवेशनको उद्घाटन समारोहमा सहभागी हुन प्रतिनिधि, नेता–कार्यकर्ता तथा शुभेच्छुकहरू खुलामञ्चतर्फ जाने क्रम तीव्र भएको छ।
काठमाडौँको टुँडिखेलस्थित खुलामञ्चमा आइतबार दिउँसो २ बजे हुने उद्घाटन समारोहका लागि उपत्यकाका विभिन्न स्थानमा बस्दै आएका कांग्रेसका प्रतिनिधि तथा शुभेच्छुकहरू कार्यक्रमस्थलतर्फ जान थालेका हुन्।
महाधिवेशनमा सहभागी हुन आएका प्रतिनिधिहरू गौशाला, कोटेश्वर, लाजिम्पाट, ठमेल, बालाजु, नयाँ बसपार्क, सुन्धारा र कलंकीलगायत क्षेत्रमा बसेका छन्। ती क्षेत्रबाट खुलामञ्चतर्फ आउने प्रतिनिधि तथा नेता–कार्यकर्ताको चहलपहल बढेको छ।
महाधिवेशनस्थलमा आउने निजी सवारीसाधनका लागि धरहराको भूमिगत पार्किङ, पुरानो बसपार्क, भृकुटीमण्डप, राष्ट्रिय सभागृह, नेपाल प्रज्ञा–प्रतिष्ठान तथा दरबारमार्गस्थित अन्नपूर्ण होटल परिसरमा पार्किङको व्यवस्था गरिएको छ।
उपत्यका बाहिरबाट प्रतिनिधि बोकेर आउने ठूला बसका लागि भने माइतीघरदेखि भद्रकालीसम्मको सडकको एक लेन प्रयोग गर्ने व्यवस्था मिलाइएको कांग्रेसले जनाएको छ।
कांग्रेसका अनुसार १५औँ महाधिवेशनमा ७ हजार ५ सयभन्दा बढी प्रतिनिधि सहभागी हुँदैछन्। महाधिवेशनको उद्घाटन समारोह दिउँसो २ बजे खुलामञ्चमा हुनेछ।
‘परम्पराको सम्मान र परिवर्तनको संकल्प : समुन्नत नेपालका लागि सबल कांग्रेसको विकल्प’ भन्ने नारासहित आयोजना गरिएको महाधिवेशनअन्तर्गत असोज १९ र २० गते बन्दसत्र तथा असोज २१ र २२ गते नयाँ नेतृत्व चयनका लागि निर्वाचन कार्यक्रम सञ्चालन हुनेछ।
