काठमाडौं । नेपाली कांग्रेसको १५औँ केन्द्रीय महाधिवेशनअन्तर्गत ६३ जिल्लामा वडा अधिवेशन सम्पन्न भएको छ । कांग्रेस केन्द्रीय कार्यसमितिका अनुसार असोज ५ गतेसम्म ताप्लेजुङदेखि कञ्चनपुरसम्मका ६३ जिल्लामा वडा अधिवेशन सम्पन्न भएको हो ।
कांग्रेसले असोज १६ देखि १९ गतेसम्म १५औँ केन्द्रीय महाधिवेशन गर्ने कार्यतालिका तय गरेको छ । त्यसअन्तर्गत असोज ३ गतेदेखि सुरु भएको वडा अधिवेशन प्रक्रिया तेस्रो दिनसम्म आइपुग्दा अधिकांश जिल्लामा सम्पन्न भएको कांग्रेसले जनाएको छ ।
धनुषा क्षेत्र नम्बर ४, मोरङ क्षेत्र नम्बर ६, अछामका तीन, डडेल्धुराका चार, रुपन्देहीका तीन, महोत्तरीका आठ तथा सप्तरीका क्षेत्र नम्बर २ र ४ लगायतका वडामा अधिवेशन अन्तिम चरणमा रहेको कांग्रेसले जनाएको छ । सिरहा, नवलपरासी क्षेत्र नम्बर २, रौतहट क्षेत्र नम्बर १ र सर्लाही क्षेत्र नम्बर २ का वडामा पनि अधिवेशन जारी छ ।
धादिङ, नुवाकोट तथा असोज ५ गतेसम्म अधिवेशन सम्पन्न हुन बाँकी रहेका वडाको अधिवेशन असोज ६ गते मंगलबार जारी रहने कांग्रेस केन्द्रीय कार्यसमितिका सदस्य–सचिव राजु कटुवालले जारी गरेको विज्ञप्तिमा उल्लेख छ ।
