काठमाडौं। नेपाली कम्युनिस्ट पार्टीका वरिष्ठ नेता तथा पूर्वप्रधानमन्त्री झलनाथ खनालले वामपन्थी शक्तिबीच नीति, सिद्धान्त, आदर्श र वैचारिक–राजनीतिक दिशाका आधारमा एकता गर्नुपर्ने बताएका छन् ।
राष्ट्रिय जनमोर्चाका महासचिव मनोज भट्टद्वारा लिखित ‘सहकारी ठगीको जालो’ पुस्तक विमोचन कार्यक्रममा बोल्दै खनालले मुलुक अस्थिरता र अनिश्चितताको अवस्थामा पुगेको भन्दै राष्ट्रियता र सामाजिक–आर्थिक रूपान्तरणका चुनौती समाधान गर्न वामपन्थी शक्तिको एकता आवश्यक रहेको बताए ।
‘एकता भनेको टाउको जोडेर हुँदैन । नीति, सिद्धान्त, आदर्श र सही वैचारिक–राजनीतिक दिशाका आधारमा मात्र एकता बनायौँ भने त्यो दिगो हुन्छ,’ खनालले भने ।
उनले विगतमा भएका गलत कार्य र सम्झौताका कारण राष्ट्रियता गम्भीर मोडमा पुगेको दाबी गरे । कमजोर हुँदै गएको वामपन्थी आन्दोलनलाई पुनःसंगठित गर्न सबै वामपन्थी शक्तिले प्रयत्न गर्नुपर्ने उनको भनाइ थियो ।
खनालले सहकारी क्षेत्रमा देखिएका समस्या समाधान गर्न विद्यमान नीति तथा कानुनमा संशोधन आवश्यक रहेको बताए । सहकारी क्षेत्रलाई बलियो बनाउन नयाँ नीतिगत तथा कानुनी आधार निर्माण गर्नुपर्ने भन्दै उनले संरचनागत सुधारबिना सहकारीलाई नयाँ उचाइमा लैजान नसकिने बताए ।
