जनकपुरधाम। धनुषाको मिथिला नगरपालिका–९ बडहरीस्थित नेपाल रेडक्रस सोसाइटीको सामुदायिक विकास केन्द्र वर्षौंदेखि निष्क्रिय बन्दै गएको छ। मानवीय सेवा र विपद् व्यवस्थापनका लागि स्थापना गरिएको केन्द्रमा अहिले भवनमा ताल्चा झुन्डिएका छन् भने चार एम्बुलेन्स र रक्त संकलनका लागि ल्याइएको विशेष बस खुला आकाशमुनि प्रयोगविहीन अवस्थामा थन्किएका छन्।
स्थानीयका अनुसार केन्द्रले वर्षौंदेखि प्रभावकारी सेवा दिन सकेको छैन। धिरजकुमार महतोले रेडक्रसको बोर्ड देखेर रगत खोज्न आउने सेवाग्राही रित्तो हात फर्किन बाध्य हुने अवस्था रहेको बताए। उनले नर्सरीबाहेक अन्य कुनै सेवा सञ्चालन नभएको भन्दै केन्द्रलाई आँखा अस्पताल वा अन्य स्वास्थ्य सेवामुखी संस्थाका रूपमा सञ्चालन गर्नुपर्ने सुझाव दिए।
उनले भने, “यहाँ रेडक्रसको बोर्ड देखेर मानिसहरू रगतका लागि आउँछन्, तर यहाँ कुनै सेवा उपलब्ध छैन।”
लालगढ उपशाखाकी पूर्वउपसभापति गोमा लामाले विगतमा केही गतिविधि भए पनि अहिले सबै सेवा ठप्प भएको बताइन्। केन्द्रको रेखदेखमा रहेकी कर्मचारी जीवनदेवी कोइरालाले पनि निर्वाचनबाहेक अन्य समयमा कुनै औपचारिक कार्यक्रम वा स्वास्थ्य सेवा सञ्चालन नभएको बताइन्।
स्थानीयले विपद्का बेला वितरणका लागि ल्याइएका चामल, दाल र तेलजस्ता राहत सामग्री समयमै नबाँड्दा गोदाममै कुहिएको र पछि खाडल खनेर गाडिएको गम्भीर आरोप लगाएका छन् ।
जिल्ला कार्यसमितिको कार्यसम्पादनमाथि प्रश्न उठेपछि नेपाल रेडक्रस सोसाइटीको केन्द्रीय कार्यालयले धनुषा जिल्ला कार्यसमिति भंग गरी पंकज महतोको नेतृत्वमा तदर्थ समिति गठन गरेको छ। निरीक्षणपछि महतोले राहत सामग्री कुहिएको घटनाको छानबिन गर्ने, थन्किएका एम्बुलेन्स र बस मर्मत गरेर सञ्चालनमा ल्याउने तथा विगतका बेथितिमा संलग्नलाई कारबाहीको दायरामा ल्याइने बताए।
उनले भने, “रेडक्रस कसैको व्यक्तिगत सम्पत्ति होइन, विगतका बेथितिको छानबिन गरेर दोषीलाई कारबाही गरिन्छ।”
लामो समयदेखि सेवा विहीन बनेको बडहरी केन्द्रलाई पुनः सञ्चालनमा ल्याउने नयाँ नेतृत्वको प्रतिबद्धताप्रति स्थानीयले भने अझै व्यवहारिक परिणामको प्रतीक्षा गरिरहेका छन्।
