विराटनगर। नेपाली कांग्रेसका पूर्वमहामन्त्री डा. शशांक कोइरालाले पार्टीभित्रको फुटप्रति गम्भीर चिन्ता जनाएका छन् । उनले कांग्रेसलाई एक बनाइरहन सबै नेताले लाग्नुपर्नेमा पनि जोड दिए ।
विराटनगरमा आइतबार भइरहेको संस्थापन इतर समूहको भेलालाई सम्बोधनका क्रममा उनले कांग्रेस फुटिसकेको जस्तो अवस्था देखिएको पनि बताए । कोइरालाले यसलाई दुर्भाग्यपूर्ण अवस्थाका रुपमा टिप्पणी गरे ।
लामो संघर्ष, त्याग र बलिदानबाट स्थापित कांग्रेस अहिले फुटको अवस्थामा पुग्नु पीडादायी भएको उनको टिप्पणी छ । पार्टी आफैँ नटुक्रिए पनि विभिन्न कारणले फुटाइएको पनि उनले गुनासो गरे ।
सर्वोच्च अदालत र निर्वाचन आयोगका केही निर्णयले कांग्रेसलाई आजको फुटको अवस्थामा लगेको उनले बताए । आयोग र सर्वोच्च दुवैले पुसको विशेष महाधिवेशनबाट सभापति बनेका गगन थापालाई मान्यता दिएका थिए ।
कोइरालाले पार्टीको संस्थागत विरासत बचाउन पार्टीभित्र एकता अपरिहार्य हुने जिकिर गरे । पार्टी बलियो नभएसम्म देश विकास र लोकतन्त्र मजबुत नहुने पनि उनको तर्क थियो ।
उनले कांग्रेसको वर्तमान नेतृत्वतिर लक्षित गर्दै पार्टीमा धेरै अनुभवी र पुराना नेतालाई पाखा पारिँदा सीमित समूहले मात्रै हाँक्न नसक्ने पनि बताए । पार्टीका सबै पक्षलाई समेट्नु अहिलेको आवश्यकता रहेको उनको टिप्पणी थियो ।
‘कांग्रेसको सबैभन्दा ठूलो आवश्यकता एकता हो । विगतका तिक्तता भुलेर सबै एकजुट हुनुपर्छ। कांग्रेस बलियो भए देशले सही दिशा पाउन सक्छ’, उनले भने, ‘०४८ सालमा गिरिजाप्रसाद कोइरालाले ठूलो परिवर्तन गर्नुभयो । कांग्रेस नै परिवर्तनको पक्षमा थियो । के गगन थापाले एक्लै पार्टी चलाउन सक्नुहुन्छ ?’
उनले अब नेताहरूले पहिले आफूलाई परिवर्तन गर्नुपर्ने बताए । कोइरालाले कांग्रेस फुटेको नभएर फुटाइएको पनि तर्क गरेका छन्।
‘आजै म कोइराला निवास पुगेँ, आँसु रसाए । कांग्रेसलाई आज टुक्र्याइएको छ । अदालतले दुई टुक्रा बनायो, यो गलत थियो,’, बानियाँले भने, ‘अब पार्टी एकता गरेर जानुपर्छ। गाउँ गाउँमा कांग्रेस भए पनि भोट आएन ।’
