काठमाडौं- श्रम संस्कृति पार्टीका अध्यक्ष हर्कराज राईले प्रधानमन्त्री वालेन्द्र शाह र नेपाली सेनाको भूमिकाबारे गम्भीर प्रश्न उठाएका छन्।
प्रतिनिधिसभाको शुक्रबारको बैठकमा बोल्दै उनले नवलपरासीको सुस्तामा भारतीय सीमा सुरक्षा बल (एसएसबी) शुक्रबार बिहान हतियारसहित प्रवेश गरेको घटनालाई लिएर सरकारको मौनताको आलोचना गरेका छन्।
बैठकको आकस्मिक समयमा बोल्दै सांसद राईले भने, ‘नेपालले भारतको भूमि मिचेको छ भनेर गएको ११ औँ दिन बितिसक्दा पनि प्रधानमन्त्री वालेन्द्र शाह संसद्मा आउने छाँटकाँट देखिँदैन।’
उनले प्रधानमन्त्री संसद्मा उपस्थित हुन नसके रक्षामन्त्रीलाई बोलाउनुपर्ने माग गरे। ‘यदि प्रधानमन्त्री आउन सक्नुहुन्न भने नेपाल सरकारको रक्षामन्त्री को हो? सभामुख डीपी अर्यालले उहाँलाई यहाँ बोलाइदिनुपर्छ,’ राईले भने।
सुस्ता घटनाको उल्लेख
राईले शुस्तामा भारतीय एसएसबीको टोलीले नेपाली नागरिकहरूलाई हप्कीदप्की दिइरहेको दृश्य देखिएको बताए।
‘सुस्तामा भारतीय एसएसबी आएर नेपाली दाजुभाइहरूलाई हप्कीदप्की गरिरहेको छ। त्यहाँ नेपाली निहत्था दाजुभाइहरू आफ्नो भूमि जोगाउन भर्खरै पनि लडिरहेका छन्,’ उनले भने।
सेनाको भूमिकामा प्रश्न
उनले नेपाली सेनालाई सीमामा पठाउन नहुने कारण के हो भनी प्रश्न गरे। ‘नेपाली सेनाले सिमाना रक्षाका लागि जानै नहुने के कसम खाएर बसेको छ? नेपाल सरकारले सेनालाई सीमानामा पठाउनै नहुने के करार गराएको छ? कहाँ के सन्धि भएको छ?’ राईको प्रश्न थियो।
छानबिन माग
राईले गृहमन्त्री सुधन गुरुङले दरबार हत्याकाण्डको छानबिन हुने बताएको सन्दर्भमा सबै विषयको छानबिन हुनुपर्ने बताए। ‘जोसुकै दोषी पाइए पनि अनुहार नहेरी, नाम नसुनी हदसम्मको कारबाही हुनुपर्छ,’ उनले जोड दिए।
हर्कले यसअघि पनि सीमा सुरक्षा, प्रधानमन्त्रीको संसदीय जवाफदेहिता र सेनाको भूमिकाबारे संसद्मा पटक पटक प्रश्न गरिसकेका छन् ।
