काठमाडौँ । नेपाली काँग्रेसका सचेतक निश्कल राईले प्रधानमन्त्री वालेन्द्र शाहले संसदमा व्यक्त गरेको नेपाल-भारत सीमा सम्बन्धी धारणा तथ्यमा आधारित नभएको बताएका छन्।
उनले यस्ता विषयमा पर्याप्त प्रमाण र आधारसहित मात्रै सार्वजनिक अभिव्यक्ति आउनुपर्ने धारणा राखेका छन्।
आइतबार संघीय संसद् भवन परिसरमा सञ्चारकर्मीहरूसँग कुरा गर्दै राईले प्रधानमन्त्रीले सार्वभौम संसद्को मञ्चबाट गरेको टिप्पणीले तथ्यगत पुष्टि खोज्ने अवस्था सिर्जना गरेको बताए। उनका अनुसार यदि नेपालले भारतको भूमि अतिक्रमण गरेको भन्ने दाबी गरिएको हो भने त्यसलाई स्पष्ट स्थान र प्रमाणसहित प्रस्तुत गर्न आवश्यक हुन्छ।
उनले संसदमा प्रधानमन्त्रीबाट तथ्य पुष्टि नभएको विषय उठाइनु उपयुक्त नहुने उल्लेख गर्दै उक्त अभिव्यक्तिप्रति असहमति जनाए। राष्ट्रिय महत्वका विषयमा जिम्मेवार पदमा रहेका व्यक्तिहरूले तथ्यमा आधारित र सन्तुलित धारणा प्रस्तुत गर्नुपर्ने उनको भनाइ थियो।
राईले राष्ट्रिय मानव अधिकार आयोगसँग सम्बन्धित विषयमा प्रधानमन्त्रीले व्यक्त गरेको धारणा पनि पर्याप्त परिपक्व र विवेकपूर्ण नरहेको टिप्पणी गरे। संवैधानिक निकायका विषयमा बोल्दा थप सावधानी आवश्यक पर्ने उनको धारणा छ।
त्यसैगरी, उनले संसदमा सांसदहरूले उठाएका प्रश्नहरूको जवाफ दिने क्रममा प्रधानमन्त्री शाहले अपेक्षाअनुसार स्पष्ट र सन्तोषजनक उत्तर दिन नसकेको दाबी गरे। संसद् सरकारलाई जबाफदेही बनाउने प्रमुख थलो भएकाले उठाइएका जिज्ञासाको तथ्यपरक र स्पष्ट सम्बोधन हुनुपर्नेमा उनले जोड दिए।
