काठमाडौँ । नेपाली काँग्रेसका नेता एनपी साउदले पार्टी भित्र आन्तरिक एकता र समन्वयलाई प्राथमिकता दिन आग्रह गर्दै क्रियाशील सदस्यताको विषयलाई लिएर थप विवाद नगर्न नेतृत्वलाई सुझाव दिएका छन्।
कैलालीको धनगढीमा आयोजित प्रदेशस्तरीय भेलालाई सम्बोधन गर्दै उनले विशेष अधिवेशनमा सहभागी नभएका नेताहरूलाई पनि समेटेर पार्टीभित्र मेलमिलाप र सहकार्यको वातावरण बनाउनुपर्ने आवश्यकता औँल्याए। उनले सभापति गगन थापासँग असन्तुष्ट पक्षसँग संवाद र समन्वय अघि बढाउन आग्रह गरेका हुन्।
साउदले पार्टी विधानले अनुशासन सम्बन्धी विषयमा स्पष्ट व्यवस्था गरिसकेको उल्लेख गर्दै कुनै सदस्यले अनुशासन उल्लंघन गरेको अवस्थामा निर्धारित प्रक्रियाअनुसार कारबाही गर्न सकिने बताए। तर, सर्वसम्मतिबाट टुंगिएको क्रियाशील सदस्यताको विषयलाई पुनः विवादको विषय नबनाउन उनले जोड दिए।
उनले पार्टीका निर्वाचन समिति तथा अनुशासन समिति गठन गर्दा सबै पक्षलाई स्वीकार्य हुने गरी प्रक्रिया अघि बढाउनुपर्ने धारणा पनि राखे। उनका अनुसार संगठनभित्र विश्वास र सहकार्यको वातावरण कायम गर्न समावेशी र सर्वस्वीकार्य संयन्त्र आवश्यक छ।
पूर्व परराष्ट्र मन्त्री समेत रहेका साउदले विशेष अधिवेशनमा सहभागी समूह र असन्तुष्ट पक्षबीच सहमति तथा एकता कायम भएपछि मात्र आगामी १५औँ महाधिवेशन प्रभावकारी रूपमा सम्पन्न गर्न सकिने बताएका छन्।
