काठमाडौँ । नेपाली काँग्रेसका सभापति गगन थापाले पार्टीको आन्तरिक व्यवस्थापन र नेतृत्व संरचनामा सबै पक्षलाई समेटेर अघि बढ्ने प्रतिबद्धता व्यक्त गरेका छन्।
काठमाडौँमा आयोजित एक अन्तरक्रिया कार्यक्रममा बोल्दै उनले नेपाली काँग्रेसको १४औँ महाधिवेशनबाट निर्वाचित भएका सम्पूर्ण नेताहरूलाई सम्मानपूर्वक केन्द्रीय समितिमा समावेश गर्न आफू तयार रहेको बताए।
थापाले विशेष महाधिवेशनमा सहभागिता जनाएका वा नजनाएका आधारमा पार्टीभित्र कुनै विभेद नहुने स्पष्ट पारे। उनका अनुसार संगठनलाई एकताबद्ध रूपमा अघि बढाउन सबै निर्वाचित प्रतिनिधिहरूलाई उचित जिम्मेवारी दिनु आवश्यक छ।
उनले १४औँ महाधिवेशनबाट निर्वाचित धेरै नेता अहिले केन्द्रीय संरचनाबाहिर रहेको उल्लेख गर्दै उनीहरूलाई पुनः जिम्मेवारीसहित समेट्ने योजना प्रस्तुत गरे। वरिष्ठताको आवश्यकता देखिएका व्यक्तिलाई वरिष्ठ पद र अन्यलाई उपयुक्त भूमिकामा समेटिने उनको भनाइ थियो।
थापाले पार्टीका निर्णय तथा अवसर वितरण कुनै पनि पक्षीय सहभागिताको आधारमा नभई समान अवसर र संस्थागत मापदण्ड अनुसार हुने बताए।
त्यसैगरी उनले महाधिवेशनसम्बन्धी विभिन्न समितिहरू गठन गर्दा निष्पक्षता सुनिश्चित गर्न आफू लचिलो रहेको उल्लेख गरे। समितिमा सहभागी हुन इच्छुक व्यक्तिहरूले आफ्नो नाम उपलब्ध गराउन सक्ने व्यवस्था गर्न पनि उनले आग्रह गरेका छन्।
