काठमाडौँ । सभामुख डोलप्रसाद अर्यालले नेपालको अन्तर्राष्ट्रिय छवि, गौरव र राष्ट्रिय प्रतिष्ठा सुदृढ हुने गरी कूटनीतिक गतिविधिलाई प्रभावकारी ढंगले अघि बढाउन सम्बद्ध निकाय र कूटनीतिक क्षेत्रलाई आग्रह गरेका छन् ।
नेपाल विश्व सम्बन्ध परिषद्ले शुक्रबार काठमाडौँमा आयोजना गरेको कार्यक्रममा सम्बोधन गर्दै उनले नेपालका कूटनीतिक प्रयासलाई थप परिणाममुखी बनाउन कूटनीतिक नियोगहरूको सक्रिय सहभागिता आवश्यक रहेको बताए ।
सभामुख अर्यालले राष्ट्रिय महत्वका विषयलाई अन्तर्राष्ट्रिय स्तरमा प्रभावकारी रूपमा प्रस्तुत गर्न विज्ञ, प्राविधिक क्षेत्र र सर्वसाधारणको सहभागिता जोडिएका कार्यक्रमलाई प्राथमिकता दिनुपर्ने धारणा राखे ।
उनका अनुसार नयाँ पुस्तालाई राष्ट्रिय सार्वभौमसत्ता, भौगोलिक अखण्डता, प्राकृतिक स्रोत, सांस्कृतिक सम्पदा तथा राष्ट्रिय पहिचानप्रति सचेत बनाउनु आवश्यक छ । त्यसका लागि शिक्षा र प्रविधिको उपयोग गर्दै अन्तर्राष्ट्रिय विज्ञहरूको सहभागितामा जनमुखी कार्यक्रम सञ्चालन गर्नुपर्ने उनले बताए ।
यस्ता गतिविधिले दीर्घकालीन रूपमा नेपालको अन्तर्राष्ट्रिय सम्बन्धलाई सकारात्मक दिशामा अघि बढाउन सहयोग पुग्ने सभामुख अर्यालको भनाइ थियो ।
उनले राष्ट्रिय नीतिका उद्देश्य हासिल गर्न विभिन्न क्षेत्रको समन्वित प्रयास अपरिहार्य रहेको उल्लेख गर्दै कूटनीतिक नियोगहरूको सहकार्यबाट नेपालको कूटनीतिक उपस्थिति विश्वस्तरमा थप सशक्त बनाउनुपर्ने आवश्यकता औँल्याए ।
