काठमाडौँ । नेपाली काँग्रेसले पार्टीका सार्वजनिक कार्यक्रमलाई अनुशासित, व्यवस्थित र समयमै सञ्चालन गर्ने उद्देश्यसहित नयाँ कार्यविधि तयार गरेको छ।
पार्टीका अनुसार तयार गरिएको उक्त कार्यविधि जेठ १ गतेदेखि कार्यान्वयनमा ल्याइनेछ। यसअघि जिल्ला र प्रदेश तहबाट प्राप्त सुझावका आधारमा कार्यविधिलाई अन्तिम रूप दिने तयारी गरिएको छ।
नयाँ व्यवस्थाअनुसार पार्टीका सबै तहका कार्यक्रमहरू तोकिएको समयमै सुरु र समापन गर्नुपर्नेछ। कार्यक्रममा प्रमुख अतिथि उपस्थित नभए पनि निर्धारित समयमा कार्यक्रम अघि बढाउनुपर्ने प्रावधान राखिएको छ।
मञ्च व्यवस्थापनमा समेत कडाइ गरिएको छ। सभापति र एक जना वक्ताबाहेक अन्यलाई मञ्चमा राख्न नपाइने व्यवस्था गरिएको छ। कार्यक्रम सुरु भएको १५ मिनेटपछि आसन ग्रहण वा मञ्चमा थप प्रवेश नगर्ने नियम पनि लागू हुने भएको छ।
वक्ताहरूको बोल्ने समय पहिले नै निर्धारण गरी त्यसैअनुसार पालना गर्नुपर्ने व्यवस्था गरिएको छ। सम्बोधन छोटो, विषय केन्द्रित र समेटिएको हुनुपर्ने उल्लेख गरिएको छ।
कार्यक्रममा घृणा, द्वेष वा हिंसा प्रोत्साहित गर्ने, साथै जातीय, धार्मिक, क्षेत्रीय वा लैंगिक विभेदजन्य अभिव्यक्ति प्रयोग गर्न नपाइने स्पष्ट प्रावधान राखिएको छ।
त्यसैगरी माला, खादा र ब्याचजस्ता सम्मान सामग्रीको प्रयोग नगर्ने निर्णय पनि कार्यविधिमा समेटिएको छ। अपाङ्गता भएका व्यक्तिलाई सहज पहुँच हुने गरी कार्यक्रम स्थल व्यवस्थापन गर्नुपर्ने व्यवस्था समेत गरिएको छ।