काठमाडौँ – प्रतिनिधि सभाका सभामुख डीपी अर्यालले आगामी बजेट अधिवेशनलाई थप प्रभावकारी र परिणाममुखी बनाउने गरी तयारी भइरहेको बताएका छन् ।
उनले संसद् सञ्चालन प्रक्रियामा पारदर्शिता अभिवृद्धि र सरोकारवालाको पहुँच विस्तारलाई प्राथमिकतामा राखिएको स्पष्ट पारेका छन् ।
सञ्चारकर्मीसँगको अन्तर्क्रियामा सभामुख अर्यालले संसदीय गतिविधि तथा समितिगत कामकारबाहीमा पत्रकारहरूको सहज पहुँच सुनिश्चित गर्न पहल भइरहेको जानकारी दिए ।
आफू सहज रूपमा सम्पर्कमा रहने व्यक्ति भएको उल्लेख गर्दै अधिकांश फोन कलहरूको जवाफ दिने गरेको पनि उनले बताए ।
हाल प्रयोगमा रहेको अस्थायी संसद् भवनका कारण प्राविधिक तथा व्यवस्थापकीय चुनौतीहरू देखिएको स्वीकार गर्दै ती समस्याहरूलाई क्रमिक रूपमा समाधान गरिने बताए ।
उच्चस्तरीय कार्यक्रमहरू, विशेष गरी राष्ट्रपतिको उपस्थितिमा हुने कार्यक्रमहरूमा समेत भौतिक संरचनाको सीमितताले असहजता सिर्जना गरेको उनको भनाइ थियो ।
पत्रकारहरूको प्रवेश अनुमति, परिचयपत्र तथा रिपोर्टिङ पहुँचसम्बन्धी व्यवस्थापनलाई सन्तुलित र न्यायोचित ढंगले मिलाउनुपर्ने आवश्यकता औँल्याउँदै कुनै पनि समूहले विभेदको अनुभूति नगर्ने गरी नीति निर्माण गरिने उनले उल्लेख गरे ।
यसैबीच प्रतिनिधि सभा को नियमावली निर्माण प्रक्रिया अघि बढिरहेको जानकारी दिँदै त्यसमा सरोकारवालाहरूको सहभागिता र पारदर्शिता सुनिश्चित गरिनुपर्नेमा जोड दिए ।
लोकतान्त्रिक व्यवस्थाको आधारभूत तत्त्व अभिव्यक्ति स्वतन्त्रता रहेको उल्लेख गर्दै संविधान र प्रचलित कानुनको सीमाभित्र रहेर सबैलाई आफ्नो धारणा राख्न पाउने वातावरण आवश्यक रहेको उनले बताए । साथै, विगतका अभ्यासहरू समयानुकूल नहुन सक्ने भन्दै प्रविधि, नयाँ पुस्ता र वर्तमान सामाजिक सन्दर्भअनुसार संसदीय अभ्यासमा सुधार आवश्यक रहेको धारणा राखे ।
संसदीय समितिहरूलाई खुला, उत्तरदायी र पारदर्शी ढंगले सञ्चालन गर्नुपर्ने अपेक्षा व्यक्त गर्दै उनले आगामी अधिवेशनलाई गुणस्तरीय र परिणाममुखी बनाउनेतर्फ केन्द्रित रहने बताएका छन् ।
