काठमाडौं । नेपाली कांग्रेसका प्रवक्ता प्रकाशशरण महतले पार्टीभित्र एकता र आत्मविश्वास सुदृढ गर्न आवश्यक रहेको बताएका छन्। वीपी चिन्तन प्रतिष्ठानले आयोजना गरेको ‘वर्तमान राजनीतिक विषयमा केन्द्रित’ कार्यक्रममा उनले पार्टीभित्रका मतभेदलाई छोडेर एकताको महत्व औंल्याए।
महतले अहिले देश गम्भीर संकटमा रहेको भन्दै कांग्रेस नेतृत्वले संगठनलाई सशक्त र एकताबद्ध बनाउनुपर्ने बेला आएको बताए। “पार्टीको मूल मर्म र भावनालाई बुझेका सक्रिय सदस्यहरूले नै नेतृत्व गर्छन्। अहिले हाम्रो बहस विशेष महाधिवेशन मंसिरमा हुनेछ, र त्यो अचुक औषधि जस्तो हुनेछ,” उनले भने।
संकटको समयमा एकअर्कामाथि आरोप–प्रत्यारोप नगरी एकताबद्ध हुनुपर्नेमा महतले जोड दिए। उनले भने, “हामीमा कमीकमजोरी अवश्य छन्, त्यसको हिस्सेदार म पनि हुँ। अब एकजुट हुने बेला हो, एकअर्कालाई औंला ठड्याउने बेला होइन।”
महतले सामाजिक सञ्जालमा फैलिने नकारात्मक टिप्पणी र राजनीतिक अविश्वासको संस्कृति प्रति चिन्ता व्यक्त गर्दै भने, “राजनीतिमा सबै खत्तम र बदमास हुन् भन्ने प्रवृत्ति जबरजस्ती सम्प्रेषित भइरहेको छ।”
उनले पार्टीभित्र देखिएको अत्यधिक आत्मनिन्दा र आत्मविश्वासको कमीलाई पनि औँल्याउँदै भने, “जति कमीकमजोरी छ, त्यो भन्दा बढी आत्मनिन्दा भएको छ। अब सुशासन र सुधारका पक्षमा ठोस रूपमा उभिनु आवश्यक छ।”
अन्तमा महतले आगामी विशेष महाधिवेशनलाई संगठन सुधार र एकताको अवसरको रूपमा लिनुपर्नेमा जोड दिए।
