काठमाडौं- नेकपा एमाले, माओवादी केन्द्र र एकीकृत समाजवादीका सांसदले कुलिङ पिरियडको विषयमा छानबिन नभएसम्म सहभागी नहुने जनाएपछि राज्य व्यवस्था तथा सुशासन समितिको बैठक स्थगित भएको छ।
आज बिहान प्रहरी विधेयकबारे छलफल गर्न बोलाइएको राज्य व्यवस्था तथा सुशासन समिति बैठक स्थगित भएको हो।
आज बिहान सभामुख देवराज घिमिरेसमक्ष समितिका सदस्यहरूले ध्यानाकर्षण गराएपश्चात पत्रकारसँग कुरा गर्दै एमालेका सांसद पदम गिरीले समिति र सदनले पारित गरेको विषयमा बीचमा बाहेक शब्द घुसाएर संसद्को गरिमालाई धूलिसाथ बनाउने काम भएकाले संलग्नलाई कारबाहीको दायरामा ल्याउनुपर्ने बताए।
संघीय निजामती सेवा विधेयकको प्रतिवेदनमा कुलिङ पिरियड सम्बन्धी व्यवस्थामा हेरफेर भएकाले छानबिन र षडयन्त्र गर्नेलाई कारबाही नभएसम्म राज्य व्यवस्था समितिको बैठक नबस्ने बताए। । ‘कहाँबाट त्रुटी भएको हो । जोबाट भएको छ निर्मम कारबाही हुनुपर्छ। गम्भीर छानबिन हुनुपर्छ, यसलाई स्वीकार्य हुँदैन। समितिको छलफलका क्रममा कसैले कुलिङ पिरियड राख्नुहुँदैन, ६ महिना वा १ वर्ष वा २ वर्ष प्रस्ताव राखियो होला तर समितिबाट निष्कर्षमा पुगेपछि जे सहमति भएको हो त्यो जस्ताको तस्तै संसदमा पेश हुने र पारित हुनुपर्थ्यो।’ गिरीले थपे, ‘यहाँ गम्भीर षडयन्त्र भएको छ,भोलिका दिनमा छानबिन गरेपछि टुंगो लाग्छ। यो छानबिन नभएसम्म राज्य व्यवस्था समितिको बैठक बस्न सक्दैन। जो-जो जिम्मेवार हुनुहुन्छ नैतिकताका आधारमा ठाउँ छोड्नुपर्छ। कारबाही भोग्नुपर्छ।’
त्यसैगरी एकीकृत समाजवादीका सांसद राजेन्द्र पाण्डेले पनि छानबिन नभएसम्म राज्यव्यवस्था समितिको बैठक नबस्ने जनाए। समितिका सदस्यले राज्य व्यवस्था समितिका सभापति र सचिवलाई कारबाही गर्नुपर्ने माग गरेका छन्।
संघीय निजामती विधेयकमा समितिले पारित गरेको कुलिङ पिरियडको विषयमा विवाद भएपछि सभापति रामहरि खतिवडाले अन्तिम समयमा बैठक स्थगित गरेका हुन् । समितिमा आज प्रहरी विधेयकमा संशोधन राखेका सांसदहरूसँग छलफल गर्ने कार्यतालिका थियो।
