काठमाडौँ, १३ भाद्र । अमेरिकामा हत्या भएकी नेपाली युवती मुना पाण्डेमाथि गोली चलाउने एक सन्दिग्ध व्यक्तिलाई प्रहरीले पक्राउ गरेको छ ।
अमेरिकाबाट सञ्चालन भइरहेको अनलाइन पोर्टल खसोखासका अनुसार सदिग्धलाई बुधवार बेलुका ८ बजे लगत्तै ट्राफिक स्टपमा पक्राउ गरिएको हो । प्रहरीले सन्दिग्धको बारेमा जानकारी सहित केही कलहरू प्राप्त गरेपछि पक्राउ गर्न सफल भएको हो ।
सन्दिग्धको हालसम्म पहिचान खुलाइएको छैन । सदिग्धसँग प्रहरीले बयान लिए पनि अभियोगहरू लगाइसकेको छैन ।
प्रहरीले केही समयअघि सिसिटिभी फुटेजबाट सन्दिग्धको तस्बिर सार्वजनिक गरेको थियो।
सिसिटिभी फुटेज अनुसार मुना मृत भेटिएको स्थानमा अभियुक्त अगस्ट २४ को बेलुका ९ बजेर ४८ मिनेटमा देखिएको प्रहरीले जनाएको छ ।
अमेरिकाको टेक्सास राज्यको ह्युस्टनस्थित अपार्टमेण्टमा नेपाली विद्यार्थी मुना पाण्डेको गोली हानेर हत्या गरिएको थियो ।
नेपालमा भोजपुरकी पाण्डे सन् २०२१ मा अध्ययनका लागि अमेरिका पुगेकी थिइन् । २१ वर्षीया मुनाको हत्या किन भयो भन्ने बारे प्रहरी अहिले पनि अनुसन्धानमै रहेको छ ।
