काठमाडौं । उद्योग, वाणिज्य तथा आपूर्तिमन्त्री दीपककुमार साहले एलपीजी ग्यासको आपूर्ति क्रमशः सहज बन्दै गएको बताएका छन् । आपूर्ति प्रणालीको मुख्य अवरोधका रूपमा कृष्णभीरको पहिरो पहिचान भएपछि सडक खुलाउन दोब्बर जनशक्ति र मेसिनरी परिचालन गरिएको उनले बताए ।
शुक्रबार सिंहदरबारमा बसेको राष्ट्रिय सभाको विकास, आर्थिक मामिला तथा सुशासन समितिको बैठकमा बोल्दै मन्त्री साहले ग्यासको लोडिङदेखि उपभोक्ताको भान्सासम्मको सम्पूर्ण आपूर्ति प्रणालीको प्राविधिक विश्लेषण गरेर समस्या पहिचान गरिएको बताए ।
‘आयात, ढुवानी, सडक, रिफिलिङ क्षमता, भण्डारण, वितरण, मागको भौगोलिक असन्तुलन, बजार व्यवस्थापन र सुरक्षा लगायतका कारणहरू पहिचान गरेर काम गरिरहेका छौँ,’ उनले भने ।
मन्त्री साहका अनुसार ग्यास आपूर्ति समस्यालाई तत्काल राहत, मध्यम अवधिमा प्रणाली सुधार र दीर्घकालीन ऊर्जा सुरक्षाका तीन तहमा सम्बोधन गर्ने योजना बनाइएको छ । त्यसअन्तर्गत ग्यास भण्डारण क्षमता विस्तार, बोटलिङ तथा वितरण क्षमता वृद्धि र आपत्कालीन मौज्दातको व्यवस्था गर्न सरोकारवालासँग छलफल भइरहेको उनले बताए ।
आफूले पदभार ग्रहण गरेलगत्तै ग्यास आपूर्ति समस्याको प्राविधिक विश्लेषणका लागि ‘फिसबोन डायाग्राम’ र ‘क्रिटिकल पाथ मेथड’ प्रयोग गरेको उनले बताए । त्यसक्रममा कृष्णभीरको पहिरोलाई आपूर्ति प्रणालीको महत्वपूर्ण अवरोधका रूपमा पहिचान गरिएको उनको भनाइ छ ।
मन्त्री साहले दैनिक उपभोग्य वस्तुको सहज आपूर्ति र मूल्य नियन्त्रणलाई पनि सरकारको प्राथमिकतामा राखिएको बताए । बजार अनुगमनलाई व्यवसायीलाई आतङ्कित बनाउने माध्यम नभई स्वच्छ प्रतिस्पर्धा र उपभोक्ता अधिकार संरक्षणको साधनका रूपमा अघि बढाइने उनले बताए ।
चाडबाडका समयमा बजार अनुगमनमा कडाइ गरिएको उल्लेख गर्दै उनले उपभोक्ता हितविपरीत काम गर्ने व्यवसायीलाई कानूनअनुसार कारबाही गरिने स्पष्ट पारे।
