सुदूरपश्चिम । सुदूरपश्चिम प्रदेशका अधिकांश स्थानमा वर्षा भइरहेको छ । बङ्गालको खाडीमा विकसित न्यूनचापीय प्रणालीको प्रभाव पश्चिमतर्फ सर्दै गएसँगै आज रातिदेखि पश्चिम नेपालमा वर्षा थप बढ्ने जल तथा मौसम विज्ञान कार्यालय अत्तरियाले जनाएको छ ।
कार्यालय प्रमुख इन्जिनियर सञ्जयकुमार साहका अनुसार आज रातिदेखि वर्षा निरन्तर बढ्ने भएकाले सुदूरपश्चिममा जोखिमका दृष्टिले थप सतर्कता अपनाउनुपर्ने अवस्था छ । शनिबारदेखि वर्षाको मात्रा अझ बढ्ने र प्रदेशका केही स्थानमा भारी वर्षाको सम्भावना रहेकाले बाढी, पहिरो तथा सडक अवरुद्ध हुने जोखिम बढ्ने उहाँले बताए ।
कार्यालयका अनुसार आज राति सुदूरपश्चिमका हिमाली क्षेत्रमा सामान्यतया बदली रही धेरै स्थानमा मेघगर्जन र चट्याङसहित मध्यम वर्षा हुने सम्भावना छ । एक–दुई स्थानमा अतिभारी वर्षाको समेत सम्भावना रहेको छ । पहाडी तथा तराई क्षेत्रमा पनि सामान्यतया बदली रही धेरै स्थानमा मेघगर्जन र चट्याङसहित मध्यम वर्षा तथा एक–दुई स्थानमा अतिभारी वर्षाको सम्भावना रहेको जनाइएको छ ।
चार जिल्ला फ्ल्यास फ्लडको उच्च जोखिममा
आगामी २४ घण्टामा सुदूरपश्चिमका चार जिल्लामा आकस्मिक बाढीको उच्च जोखिम रहेको बाढी पूर्वानुमान महाशाखाले जनाएको छ ।
शनिबार बिहान ८ बजेदेखि लागू हुने २४ घण्टे फ्ल्यास फ्लड जोखिम पूर्वानुमानमा डडेलधुरा, डोटी, कैलाली र कञ्चनपुरलाई उच्च जोखिमको तहमा राखिएको छ ।
त्यस्तै, बैतडी, दार्चुला, बाजुरा, अछाम र बझाङमा मध्यम जोखिम रहेको कार्यालय प्रमुख साहले जानकारी दिनुभयो । पछिल्लो समय विभिन्न स्थानमा भइरहेको वर्षाका कारण साना नदी, खोला तथा खहरेमा पानीको बहाव बढ्नसक्ने भएकाले आकस्मिक बाढीको जोखिम बढेको उहाँले बताए ।
उच्च जोखिममा रहेका जिल्लाका नदी तथा खोला तटीय क्षेत्र र होचा भूभागमा बसोबास गर्ने नागरिकलाई विशेष सतर्कता अपनाउन आग्रह गरिएको छ । स्थानीय तह तथा सम्बन्धित निकायलाई आपत्कालीन तयारीका सामग्री तथा उद्धार र राहतका स्रोतसाधन तयारी अवस्थामा राख्न समन्वय भइरहेको साहले बताए ।
डडेलधुरा, डोटी, कैलाली र कञ्चनपुरका बासिन्दालाई नदी, खोला तथा खहरे आसपास अनावश्यक आवतजावत नगर्न, पानीको सतह बढेका बेला खोला नतर्न तथा मौसम र बाढीसम्बन्धी सूचना नियमित लिन आग्रह गरिएको छ । जोखिम बढेमा स्थानीय प्रशासन तथा सुरक्षा निकायको निर्देशनअनुसार सुरक्षित स्थानमा जानसमेत तयारी अवस्थामा रहन भनिएको छ ।
मध्यम जोखिममा रहेका बैतडी, दार्चुला, बाजुरा, अछाम र बझाङका नदी तथा खोलाको जलस्तर बढ्नसक्ने भएकाले तटीय तथा होचा भूभागमा बसोबास गर्ने नागरिकलाई सतर्क रहन आग्रह गरिएको छ । स्थानीय तह र सम्बन्धित निकायलाई नदीको अवस्था निरन्तर निगरानी गर्दै समुदायलाई समयमै सूचना प्रवाह गर्न भनिएको छ ।
भजनीमा ७५.६ मिलिमिटर वर्षा
जल तथा मौसम विज्ञान विभागको पछिल्लो वर्षा निगरानीअनुसार सुदूरपश्चिमका विभिन्न स्थानमा उल्लेख्य वर्षा भएको छ । केही स्थानमा पछिल्लो २४ घण्टामा ७० मिलिमिटरभन्दा बढी वर्षा मापन भएको विभागले जनाएको छ ।
सबैभन्दा बढी कैलालीको भजनी नगरपालिका क्षेत्रमा ७५.६ मिलिमिटर वर्षा मापन गरिएको छ । वर्षा थप बढ्ने सम्भावनालाई ध्यानमा राख्दै नदी तथा खोलामा पानीको बहाव बढ्नसक्ने भएकाले आवश्यक तयारी गर्न आग्रह गरिएको छ ।
यसैबीच, सुदूरपश्चिमका अधिकांश स्थानीय तहले पूर्वतयारीस्वरूप नियमित मौसमी बुलेटिन अद्यावधिक गरी विभिन्न माध्यमबाट समुदायमा सूचना प्रवाह गरिरहेका छन् । बाढी तथा अतिवृष्टिसम्बन्धी सूचना लिन टोल फ्री नम्बर ११५५ मा सम्पर्क गर्नसमेत आग्रह गरिएको छ ।
